ئه‌ڤرۆ ئه‌ردۆغان دێ سه‌ره‌دانا وه‌لاتێن كه‌نداڤى كه‌ت
بەلاڤ بکە
گاڤ
بڕیاره ئه‌ڤرۆ سه‌رۆكێ توركیا ده‌ست ب گه‌شته‌كا فه‌رمى یا چار رۆژى بۆ هژماره‌كا وه‌لاتێن كه‌نداڤى بكه‌ت و په‌یوه‌ندیێن توركیا دگه‌ل وان وه‌لاتان پێشڤه ببه‌ت.
سه‌رۆكاتیا توركیا راگه‌هاند، ئه‌ڤرۆ ره‌جه‌ب ته‌یب ئه‌ردۆغان سه‌رۆككۆمارێ توركیا ب سه‌رۆكاتیا شانده‌كێ حكومه‌تێ و پشكداریا پترى 200 بازرگان و خودان كاران دێ سه‌ره‌دانا هژماره‌كا وه‌لاتێن عه‌ره‌بى یێن كه‌نداڤى كه‌ت.
فه‌رمانگه‌ها په‌یوه‌ندیان سه‌ر ب سه‌رۆكاتیا توركیا ڤه د راگه‌هاندنه‌كێ دا دیاركر، ئه‌ڤرۆ ئه‌ردۆغان دێ سه‌ره‌دانا سعوودییێ، سوبه‌هى سه‌ره‌دانا قه‌ته‌رێ كه‌ت و ل 19 هه‌یڤێ دێ چیته ئیماراتێ و 20 هه‌یڤێ ژى دێ سه‌ره‌دانا قوبرسا توركیا كه‌ت.
ل گۆره‌ى وێ راگه‌هاندنێ، د سه‌ره‌دانا خۆ دا بۆ وه‌لاتێن كه‌نداڤى ئه‌ردۆغان دێ په‌یوه‌ندیێن دوقۆلى دگه‌ل وان بهێز كه‌ت، ژ وان ژى په‌یوه‌ندیێن بازرگانى و ئابۆرى و باسكرنا پێشهاتێن ده‌ڤه‌رێ و جیهانێ.
دگه‌ل چونا ئه‌ردۆغانى بۆ وه‌لاتێن كه‌نداڤى، ئه‌ڤرۆ دێ كۆڕبه‌ندێ كارێ سعوودییێ – توركیا ل جه‌ده‌یێ و سوبه‌هى دێ كۆڕبه‌ندێ كارى یێ قه‌ته‌رێ – توركیا ل ده‌وحه برێڤه چیت و ل 19ى هه‌یڤێ ژى دێ كۆڕبه‌ندێ ئیمارات - توركیا ل ئه‌بوزه‌بى برێڤه چیت.
