گاڤ - تایبەت
پشتی ئەندامێن نوی یێن مەکتەبا سیاسی هاتینە هەلبژارتن، بریارە بۆ هەر مەکتەبەکا رێکخستنێ ل پارێزگەهان ئەندامەکێ مەکتەب سیاسی بهێتە دیارکرن و گاڤ زانیە سەربەست لەزگین دێ بیتە بەرپرسێ رێکخستنا پارێزگەهێن دهۆک و نەینەوا.
ئێک ژ خالێن پەیروەێ نوی یێ کو د کۆنگرەیێ 14 ێ دا هاتی ئەوە" ل هەر پارێزگەهەکێ مەکتەبەکا رێکخستنێ ل جهێ جڤاتێن سەرکردایەتیێن پارێزگەهان بهێتە دانان کو پێدڤیە بەرپرسێ وێ ئەندامێ مەکتەبا سیاسی بیت".
ل گۆرەی زانیاریێن گاڤ، سەربەست لەزگین سندۆرى ئەندامێ نوی یێ مەکتەبا سیاسی یا پارتی دێ بیتە بەرپرسێ مەکتەبا رێخکستنێ ل دەڤەرێ کو ئەو مەکتەب سەرپەرشتیا هەمی لقێن سنۆرێ پارێزگەها دهۆک و مویسل دکەت و بارەگەهێ وێ مەکتەبێ دێ ل سەنتەرێ باژێرێ دهۆکێ هێتە دانان.   
گاڤ زانیە ژی  پارتی دخوازیت هەر زوی ئەو مەکتەب دەست بکاربیت داکو هەیکەلیەتا وێ بهێتە دانان و ئامادەکاریان بکەن بۆ پرۆسەیا هەلبژارتنێن بهێت یێن پەرلەمانێ کوردستانێ کو بریار ئەوە ل سالا بهێت بهێنەکرن.
ئەڤ مەکتەبا رێخکستنێ دێ جێگرەکێ بەرپرسی هەبیت کو پێدڤیە ئەندامێ سەرکردایەتیێ بیت.
سەربەست لەزگین سندۆرى، پێشتر به‌رپرسیاریا چه‌ندین لقێن پارتى ل بادینان كریه‌، پاشان وه‌ك بریكارێ وه‌زاره‌تا پێشمه‌رگه‌ى كاركریه‌، د كۆنگره‌یێ 14ێ یێ پارتى ژى دا، ب 577 ده‌نگان بۆ سه‌ركه‌فتیێ 7ێ یێ كۆمیته‌یا ناڤه‌ندى یا پارتى و پاشان ب بریارا سه‌رۆك مه‌سعوود بارزانى وه‌ك ئه‌ندامێ مه‌كته‌با سیاسى یا پارتى هات هه‌لبژارتن.