گاڤ- تایبەت
بەغدا ب بریارەکێ و بێی ئاگەهداریا پێشوەخت پلێتێن ئەرزاقێ پتری 11 هزار ئاوارەیێن ئاکنجیێن دهۆکێ ڤەگوهاستە مویسل و بەرپرسەکێ کورد ژی ب بریارەکا سیاسی دزانیت.
حسێن سەبری، رێکخەرێ وەزارەتا بازرگانیا هەرێمێ ل گەل بەغدا ب گاڤ راگەهاند؛ تنێ د هه‌یڤا یازدە یا ئەڤسالە دا، وەزارەتا بازرگانیا ئیراقێ ناڤێن 11 هزار 473 سەرۆک خێزانێن ئاوارەی دهۆکێ کو چەندین سالن ل دهۆکێ ئەرزاقی وەردگرن، ڤەگوهاستنە مویسل و گۆت: ئێدی ئەرزاقێ ڤان دێ هێتە برین و پێدڤیە بچنە مویسل و ل وێرێ مامەلەیێن نوى چێکەن هەتاکو ئەرزاقی وەربگرن.
وی بەرپرسی زێدەتر دیارکر؛ هندەک ژ وان خێزانان پتری 16 سالانە ل دهۆکێ و ل ڤی باژێری کاردکەن و ئەو وێ بریارێ ب بریارەکا سیاسی دزانن، ژبەرکو بێی ئاگەهداریا پێشوەخت و بێی زانینا ئەوان بوویە.
ئەڤ خێزانێن پلێتێن وان هاتینە ڤەگوهاستن هەمی خەلکێ ناڤ مویسل، زمار، تەلەعفەر و دەڤەرێن دی نە کو پتری 57 هزار کەسانە و تنێ ئاواره‌یێن شنگالێ د ناڤ دا نینن.