گاڤ

سەرۆکێ بەرێ یێ پەرلەمانێ ئیراقێ گەفان دکەت گەر سەرۆکێ نوی یێ پەرلەمانی ژ پارتییا وی نەبیت، ئەو دێ خۆ ژ پرۆسەیا سیاسی یا ئیراقێ ڤەکێشن.

محەمەد حەلبۆسی، سەرۆکێ بەرێ یێ پەرلەمانێ ئیراقێ ئەڤرۆ راگەهاند: سەرۆکاتییا پەرلەمانێ ئیراقێ پشکا پارتییا تەقەدومە، لەورا هەر کەسەکێ ببیتە سەرۆکێ پەرلەمانی، گەر ژ پارتییا تەقەدوم نەبیت، ئەو دێ ب ئێکجاری خۆ ژ پەرلەمانی و حکومەتێ ڤەکێشن.

حەلبۆسی هەروەسا دیارکر: سەرۆکاتییا پەرلەمانێ ئیراقێ ل گۆرەی رێککەفتنەکا پێشوەخت پشکا سوننەیانە و ژ سوننەیان ژی، پشکا تەقەدومە، لەورا نابیت ژ بەر هەڤڕکێن وی یێن سیاسی، سەرۆکاتییا پەرلەمانی بدەنە ئالییەکێ دی.

محەمەد رێکان حەلبۆسی، ژ مەها ئیلۆنا سالا 2018ێ تا مەها چرییا دویێ یا سالا 2023یێ سەرۆکێ پەرلەمانێ ئیراقێ بوو، ل وی دەمی حەلبۆسی ژ کارێ وی هاتە لادان و تا نوکە چ سەرۆکێن نوی بۆ پەرلەمانێ ئیراقێ نەهاتینە دانان.