گاڤ

دهێته‌ چاڤه‌رێكرن پرۆژه‌یێ رێكا گه‌شه‌پێدانێ قه‌باره‌یێ بازرگانيیێ دناڤبه‌را ئیراقێ و توركیا دا ژ 20 ملیار دۆلاران بۆ 30 تا 40 ملیار دۆلاران زێده‌ بكه‌ت.

ئیراق و توركیا و ئیمارات و قه‌ته‌ر دێ گۆپیتكه‌كا وه‌زارى یا چارقۆلى ل دۆر پرۆژه‌یێ رێكا گه‌شه‌پێدانێ گێڕن، ئه‌و پرۆژه‌یێ كو تێدا ئیراق و توركیا دێ ب رێكا هێله‌كا شه‌مه‌نده‌فڕێ و هێله‌كا ئه‌ردى یا ب له‌ز ب ئه‌ورۆپا ڤه‌ هێنه‌ گرێدان، هه‌روه‌سا هه‌ر ئێك ژ ئیمارات و قه‌ته‌ر ژى پشكدارییێ تێدا دكه‌ن.

ده‌زگه‌هێن راگه‌هاندنێ یێن توركى ئه‌ڤرۆ چارشه‌مبییێ راگه‌هاندینه‌ "توركیا، ئیراق، ئیمارات و قه‌ته‌ر د رژدن گۆپیتكه‌كا چارقۆلى ل سه‌ر ئاستێ وه‌زارى ل دۆر پرۆژه‌یێ رێكا گه‌شه‌پێدانێ گرێبده‌ن".

ل گۆره‌ى پێشبینییا عه‌بدولقادر ئورال ئوغلۆ وه‌زیرێ ڤه‌گوهاستن و ژێرخانه‌یێ یێ توركیا؛ ئه‌و گۆپیتكا چار قولى دێ د ده‌مێ دو هه‌یڤێن بهێت دا هێته‌ كرن.

ل دۆر یاداشتنامه‌یا لێكتێگه‌هشتنێ یا دناڤبه‌را ئیراق، توركیا، قه‌ته‌ر و ئیماراتێ دا ل به‌غدا هاتیه‌ ئیمزاكرن، وى وه‌زیرێ توركى گۆتیه‌ "ئه‌و رێككه‌فتنه‌ك بوو ب بزاڤێن توركیا و ئیراقێ و هه‌روه‌سا پشكدارییا ئیماراتێ و قه‌ته‌رێ ژى".

ئوغلۆى ئاماژه‌ ب وێ چه‌ندێ ژى كر "كۆمبوونێن حه‌فتییانه‌ دناڤبه‌را به‌رپرسێن توركیا و ئیراقێ دا ل دۆر پرۆژه‌ى دهێنه‌ كرن".

سه‌باره‌ت گاڤێن بجهئینانا وى پرۆژه‌ى، ئورال ئوغلۆ دیاركریه‌ كو ئه‌و دێ د هه‌یڤێن بهێت دا ئۆفیسان ل ئیراقێ و توركیا د چارچووڤه‌یێ پرۆژه‌ى دا ڤه‌كه‌ن.

ئاشكرا ژى كر "ل گه‌ل ده‌ستبكاربوونا رێكا گه‌شه‌پێدانێ دێ قه‌باره‌یێ بازرگانییێ ژ 20 ملیار دۆلاران بۆ 30 تا 40 ملیار دۆلاران بلند بیت".

به‌رى چه‌ند رۆژان، توركیا و ئیراقێ و قه‌ته‌رێ و ئیماراتێ یاداشتنامه‌یه‌كا لێكتێگه‌هشتنێ یا چارقولى ل دۆر پرۆژه‌یێ رێكا گه‌شه‌پێدانێ ب به‌رهه‌ڤبوونا محه‌مه‌د شیاع سوودانى سه‌رۆكوه‌زیرێ ئیراقێ و ره‌جه‌ب ته‌یب ئه‌ردۆگان سه‌رۆككۆمارێ توركیا و نوینه‌رێن قه‌ته‌رێ و ئیماراتێ ل به‌غدا ئیمزاكربوون.