گاڤ

ده‌سته‌یا گشتى یا گۆمركێن ئیراقێ و رێڤه‌به‌رییا گۆمركان یا ئیرانێ رێككه‌فتنه‌كا نوى بۆ بساناهیكرنا بازرگانییا دوقولى دناڤبه‌را هه‌ردو وه‌لاتان دا ئیمزاكرن.

د به‌رده‌وامییا رێككه‌فتنێن گۆمركى دناڤبه‌را ئیراقێ و ئیرانێ دا، ئاژانسا ته‌سنیم یا ئیرانى راگه‌هاند "حه‌سه‌ن حه‌موود حه‌سانى رێڤه‌به‌رێ ده‌سته‌یا گشتى یا گۆمركێن ئیراقێ و محه‌مه‌د رزوانى فه‌ر هاریكارێ وه‌زیرێ ئابوورى یێ ئیرانێ و رێڤه‌به‌رێ گشتى یێ رێڤه‌به‌رییا گۆمركان یا ئیرانێ ئه‌ڤرۆ چارشه‌مبییێ رێككه‌فتنه‌كا نوى ئیمزاكرن".

رێڤه‌به‌رێ ده‌سته‌یا گۆمركێن ئیراقێ دبێژیت "ئیران ئێك ژ گرنگترین هه‌ڤپشكێن بازرگانییێ یه‌ بۆ ئیراقێ و ئێك ژ كارێن پێشینه‌ بۆ ئیراقێ پێشڤه‌برنا په‌یوه‌ندیێن بازرگانییه‌ دناڤبه‌را هه‌ردو وه‌لاتان دا".

ژ لایێ خۆڤه‌، رێڤه‌به‌رێ گشتى یێ رێڤه‌به‌رییا گۆمركان یا ئیرانێ دیاركر "هه‌ماهه‌نگى د رێكاران و سیاسه‌تان دا و بجهئینانا رێكێن هه‌ڤشێوه‌ ل ده‌رگه‌هێن سنوورى و گونجاندنا رۆژ و ده‌مژمێرێن كارى دناڤبه‌را گۆمركێن هه‌ردو وه‌لاتان دا دێ بازرگانییێ ب هێز كه‌ت هه‌روه‌سا دێ شه‌پرزه‌ییا بازرگان و بزسنمانان ل هه‌ردو وه‌لاتان كێمكه‌ت".

ل گۆره‌ى داتایان، د ساله‌كێ دا ئیراقێ ب بهایێ 7 ملیار دۆلاران كه‌لوپه‌ل و به‌رهه‌مێن نه‌په‌ترۆلى ژ ئیرانێ هاورده‌كرینه‌ و د به‌رانبه‌ر دا ئیرانێ ب بهایێ نێزیكى 580 ملیۆن دۆلاران كه‌لوپه‌ل و به‌رهه‌م ژ ئیراقێ هاورده‌كرینه.