د هه‌شت سالان دا 100 هزار ئیراقى ژ به‌ر گوهۆڕینێن سه‌قاى ژ ده‌ڤه‌رێن خۆ كۆچبه‌ر بووینه
بەلاڤ بکە
گاڤ
هه‌ر ژ سالا 2016 تا سالا بۆرى، 100 هزار ئیراقى ژ به‌ر گوهۆڕینێن سه‌قاى ژ ده‌ڤه‌رێن ئاكنجیبوونا خۆ كۆچبه‌ر بووینه.
فازل غه‌راوى سه‌رۆكێ سه‌نته‌رێ ستراتیژى یێ مافێن مرۆڤى ل ئیراقێ ئه‌ڤرۆ چارشه‌مبییێ راگه‌هاند "ژ به‌ر گوهۆڕینێن سه‌قاى، هه‌ر ژ سالا 2016 هه‌تا سالا بۆرى، 100 هزار ئیراقى ژ ده‌ڤه‌رێن ئاكنجیبوونا خۆ كۆچبه‌ر بووینه، ئانكۆ رێژه‌یا 15% ژ ئاكنجییێن وان ده‌ڤه‌رێن زیانڤێكه‌فتى كو ئه‌ڤ رێژه‌یه دبیته كه‌سه‌ك ژ هه‌ر 10 كه‌سان".
دیار ژى كر "ئیراق دهێته پۆلینكرن وه‌ك پێنجه‌م وه‌لاتێ رویبروى تێكچوونا سه‌قاى دبیت، ئه‌ڤ چه‌نده ژ به‌ر بلندبوونا پله‌یێن گه‌رمییێ، نه‌بارینا رێژه‌یا پێدڤى ژ بارانان، زێده‌بوونا هشكه‌سالییێ و كێمبوونا ئاڤێ، زێده‌بارى باهۆزێن تۆزێ یێن به‌رده‌وام و بیابانبوون و له‌هیییان".
ئاماژه ب وێ چه‌ندێ ژى كر "هه‌روه‌سا ئاریشه‌یا تێكچوونا ئه‌ردێن چاندنێ ژى هه‌یه و سیاسه‌تێن ئاڤێ یێن ده‌وله‌تێن جیران بووینه ئه‌گه‌رێ كێمبوونا ئاڤێ".
ل دۆر وان پارێزگه‌هێن پترین رێژه‌یا كۆچبه‌رییێ ژ به‌ر گوهۆڕینێن سه‌قاى لێ هاتینه تۆماركرن، غه‌راوى دبێژیت "ل پارێزگه‌هێن میسان، به‌سره، زیقار و واست پترین كۆچبه‌رى ژ به‌ر سه‌قاى هاتینه تۆماركرن".
ناڤهاتى داخواز ژ حكومه‌تێ كر د پێنج سالێن بهێت دا دارستانان بچینیت، رێگرییێ ل فرۆشتنا بیستانان وه‌ك پارچه‌یێن ئه‌ردى یێن ئاكنیجبوونێ بكه‌ت هه‌روه‌سا ده‌ستپێشخه‌رییا چاندنا ملیۆن دارخۆرمه‌یان ده‌ستپێبكه‌ت.
هه‌روه‌سا داخوازكر ئاریشه‌یێن ژینگه‌هێ بهێنه چاره‌كرن و كه‌سێن ژ به‌ر ژینگه‌هێ ئاواره‌بووین بهێنه قه‌ره‌بۆكرن، زێده‌بارى هنده‌ك داخوازیێن دى.
