بلۆمبێرگ: ئیراقێ زێدهتر ژ وى سنوورێ ئوپێك بۆ داناى پهترۆل بهرههمئینایه
گاڤ
ئاژانسهكا جیهانى راگههاندیه؛ سهرهراى سۆزێن كێمكرنا بهرههمئینانا پهترۆلێ ژ لایێ وهلاتێن ئوپێك پلهس ڤه، لێ ئهڤ چهنده ژ لایێ هندهك وهلاتان ڤه ب تهمامى نههاتیه بجهئینان، ژ وان وهلاتان ژى ئیراقه.
ل گۆرهى ئاژانسا بلۆمبێرگ "د ههیڤا نیسانێ دا، وهلاتێن ئوپێك پلهس رۆژانه 26.81 ملیۆن بهرمیلێن پهترۆلێ بهرههمئیناینه، ب كێمبوونا ب بڕێ 50 هزار بهرمیلان رۆژانه ب ههڤبهركرن ل گهل ههیڤا بهرى وێ".
دیار ژى كریه "سنوورداركرنا بهرههمئینانێ ئهوا وهلاتێن ئوپێك و ههڤپهیمانێن وێ ل دهستپێكا ئهڤ ساله ل سهر رێككهفتین، تا نوكه ب تهمامى نههاتیه بجهئینان".
ئاشكرا ژى كریه "ئیراق و ئیمارات د بهردهوامن د بهرههمئینانێ دا زێدهتر ژ وى سنوورێ رێككهفتن ل سهر هاتیه كرن".
ههر ل گۆرهى وێ راپۆرتێ "ئیراقێ رۆژانه 4.22 ملیۆن بهرمیلێن پهترۆلێ بهرههمئیناینه، ئانكۆ ب بڕێ 220 هزار بهرمیلێن رۆژانه پتر ژ ئارمانجا ئوپێك پلهس".
ئوپێك بهرى نوكه بڕیارا كێمكرنا بهرههمئینانێ ژ لایێ وهلاتێن ئهندام ڤه ژ بۆ بلندكرن و سهقامگیرییا بهایێن پهترۆلێ دابوو و ئهڤ بڕیاره ههتا ههیڤا خزیرانێ هاتیه درێژكرن و دهێته چاڤهرێكرن ل وى دهمى بڕیارهكا نوى یا ههڤشێوه بهێته دان.