گاڤ

سه‌رۆكێ پارتا ته‌قه‌دوم پێشبینیكر ب ته‌وافوقێ كه‌سه‌ك بۆ پۆستێ سه‌رۆكێ په‌رله‌مانێ ئیراقێ بهێته‌ ده‌ستنیشانكرن هه‌روه‌سا دوباره‌ نه‌رازیبوونا خۆ ل سه‌ر وه‌رگرتنا پۆستێ سه‌رۆكێ په‌رله‌مانى ژ لایێ كه‌سه‌كى ڤه‌ ژ ده‌رڤه‌ى پارتا ته‌قه‌دوم ده‌ربڕى.

محه‌مه‌د حه‌لبووسى سه‌رۆكێ به‌رێ یێ په‌رله‌مانى ئه‌ڤرۆ ئه‌ینییێ پێشبینیكر ب ته‌وافوقێ كه‌سه‌ك بۆ پۆستێ سه‌رۆكێ په‌رله‌مانى بهێته‌ ده‌ستنیشانكرن هه‌روه‌سا د ده‌مێ رۆژێن بهێت دا په‌یره‌وێ ناڤخۆ یێ په‌رله‌مانى بهێته‌ راستڤه‌كرن.

ل دۆر ده‌ستنیشانكرنا به‌ربژاره‌كى ژ ده‌رڤه‌ى پارتا ته‌قه‌دوم بۆ پۆستێ سه‌رۆكێ په‌رله‌مانى گۆت "ته‌قه‌دو‌م پڕانییا په‌رله‌مانى هه‌یه‌ و پۆستێ سه‌رۆكێ په‌رله‌مانى ئیستیحقاقه‌كا سیاسى و یا هه‌لبژارتنایه بۆ حزبێ‌".

پارتا ته‌قه‌دوم ل سێشه‌مبییا بۆرى ئاماژه‌ دابوو ئوپشنێ خۆڤه‌كێشانێ ژ ده‌ستهه‌لاتێن بجهئینانێ و یاسادانانێ و ژ پرۆسێسا سیاسى ل ئیراقێ ئه‌گه‌ر پۆستێ سه‌رۆكێ په‌رله‌مانى ب به‌ربژاره‌كێ ژ ده‌رڤه‌ى حزبێ بهێته‌ دان.

په‌رله‌مانێ ئیراقێ ل ناڤه‌راستا هه‌یڤا چرییا دوێ یا سالا بۆرى ب پشتبه‌ستن ب بڕیاره‌كا دادگه‌ها فیدرالى، ئه‌ندامه‌تییا محه‌مه‌د رێكان حه‌لبووسى د په‌رله‌مانى دا پشتى سكالایه‌كا له‌یس دلێمى په‌رله‌مانتارێ به‌رێ ل سه‌ر وى ب دویماهیك ئینابوو.

په‌رله‌مانێ ئیراقێ ل رۆژا 13ى هه‌یڤا كانوینا دوێ یا بۆرى روینشتنا هه‌لبژارتنا سه‌رۆكێ په‌رله‌مانى ئه‌نجامدابوو و د گه‌ڕا ئێكێ یا ده‌نگدانێ دا چ ژ به‌ربژاران پڕانییا ره‌ها یا پێدڤى بده‌ستڤه‌نه‌ئینابوون و به‌رى گه‌ڕا دوێ یا ده‌نگدانێ بهێته‌ ئه‌نجامدان، روینشتن هاتبوو هه‌لگرتن، د گه‌ڕا ئێكێ یا ده‌نگدانێ دا شه‌علان كره‌یم پترین ده‌نگ بده‌ستڤه‌ئینابوون و ل دویڤ دا سالم عیساوى هاتبوو و تا نوكه‌ بابه‌تێ هه‌لبژارتنا سه‌رۆكێ په‌رله‌مانى نه‌هاتیه‌ ئێكلاكرن.