گاڤ
ئه‌ندامه‌كێ جڤاتا پارێزگه‌ها كه‌ركووكێ ئه‌ڤرۆ شه‌مبییێ ئه‌گه‌رێ نه‌ئێكلاكرنا پۆستێ پارێزگارێ كه‌ركووكێ و پێكئینانا حكومه‌تا خۆجهى ئاشكرا كر.
ئه‌حمه‌د ره‌مزى ئه‌ندامێ جڤاتا پارێزگه‌ها كه‌ركووكێ بۆ گاڤ دبێژیت "نه‌ئێكلاكرنا محه‌مه‌د شیاع سوودانى سه‌رۆكوه‌زیرێ ئیراقێ بۆ پۆستێ پارێزگارێ كه‌ركووكێ ژ بۆ رێكنه‌كه‌فتنا فراكسیۆنێن سیاسى دناڤبه‌را خۆ دا ل سه‌ر دیتنه‌كا هه‌ڤپشك ڤه‌دگه‌ڕیت".
دیار ژى كر "چ لایه‌ن نه‌شێن ب تنێ كارگێرییا كه‌ركووكێ بده‌ستڤه‌بینن بێى رازیبوونا لایه‌نێن دى چونكى كه‌ركووكێ پێدڤى ب پشكدارییا هه‌مى پێكهاته‌یێن وێ ژ عه‌ره‌ب، كورد، توركمان و مه‌سیحییان هه‌یه‌".
ئاماژه‌ ب وێ چه‌ندێ ژى كر "جڤاتا پارێزگه‌ها كه‌ركووكێ و كۆمبوونێن وێ گرێدایه‌ ب ته‌وافوقێ ل سه‌ر برێڤه‌برنا پارێزگه‌هێ و كا كى دێ بیته‌ پارێزگار".
پشتى بۆرینا نێزیكى پێنج هه‌یڤان ل سه‌ر هه‌لبژارتنێن جڤاتا پارێزگه‌ها كه‌ركووكێ، هێشتا لایه‌نێن سیاسى نه‌گه‌هشتینه‌ رێككه‌فتنێ بۆ پێكئینانا حكومه‌تا خۆجهى.
ل 21ى شوباتا بۆرى، محه‌مه‌د شیاع سوودانى سه‌رۆكوه‌زیرێ ئیراقێ سه‌رپه‌رشتییا كۆمبوونا فراكسیۆنێن سه‌ركه‌فتى د هه‌لبژارتنێن جڤاتا پارێزگه‌ها كه‌ركووكێ دا كربوو.
ژ به‌ر یه‌كسانییا كورسیێن پێكهاته‌یان ل كه‌ركووكێ، تا نوكه‌ چ لایه‌ن نه‌شیاینه‌ پڕانییا پێدڤى بۆ هه‌لبژارتنا پارێزگارێ كه‌ركووكێ بده‌ستڤه‌بینن.