گاڤ

لێكۆلینه‌كا زانستى یا نوى ئاشكرا كریه‌ كو فێربوونا كلاسیك یا ب رێكا كاغه‌زێ و قه‌له‌مى باشتره‌ ژ فێربوونا ب رێكا ئۆنلاین و ئامیره‌یێن ئه‌له‌كترۆنى.

ل گۆره‌ى ئه‌نجامێن لێكۆلینا نوى یا د كۆڤارا ساینتیفیك ئه‌مریكا دا به‌لاڤبووى؛ ئه‌وێن ب ده‌ستێن خۆ تێبینیان دنڤیسن و كاغه‌زێ و قه‌له‌مى بكاردئینن ئانكۆ ب رێكا كلاسیك یا كه‌ڤن، وان چالاكیه‌كا باشتر د مێشكى دا، بیردانكه‌كا بهێزتر و شیانێن پتر یێن فێربوونێ هه‌نه‌.

لێكۆله‌رێن زانكۆیا نه‌رویجى یا زانست و ته‌كنولۆژى د لێكۆلینا خۆ دا چاڤدێریا چالاكیا مێشكى یا وان قۆتابیان كرینه‌ یێن تێبینیان دنڤیسن و بۆ وان دیاربوویه‌ كو ئه‌وێن ب ده‌ستى دنڤیسن وان ئاستێن پتر ژ چالاكیا كاره‌بایى ب رێكا گرۆپه‌كێ به‌رفره‌هـ ژ ده‌ڤه‌رێن مێشكى یێن پێكڤه‌گرێداى یێن به‌رپرس ژ لڤینێ، دیتنێ و بیردانكێ هه‌نه‌.

ل گۆره‌ى لێكۆلینا نوى، ئه‌و كه‌سێن ب رێكا كۆمپیۆته‌رێ تێبینیان دنڤیسن، وان بێى هزركرن دنڤیسین.

به‌رى نوكه‌ ژى ژماره‌یه‌كا شاره‌زایان به‌حسێ گرنگیا فێركرنا زارۆیان ب رێكا نڤیسینا په‌یڤان و وێنه‌كێشانێ ب ده‌ستى كربوون.

لێكۆلینێن به‌رى نوكه‌ ئاشكرا كربوون كو نڤیسینا ب ده‌ستى ده‌ڤه‌رێن جودا جودا یێن مێشكى دده‌ته‌ كارى.