ههڤڕكییهكا مهزن دناڤبهرا دهستههلاتێ و ئوپوزیسیۆنێ د ههلبژارتنێن باژێڕڤانییان یێن توركیا دا دێ ههبیت
گاڤ
ههڤڕكییهكا مهزن دناڤبهرا پارتا داد و گهشهپێدان و پارتا گهل یا كۆمارى د ههلبژارتنێن باژێڕڤانییان یێن توركیا دا و ب تایبهت ل باژێڕڤانیێن ستهنبۆلێ و ئهنقهره دێ ههبیت.
ژڤانه ل رۆژا ئێكشهمبیا بهێت 31ى ئادارێ ههلبژارتنێن باژێڕڤانییان یێن توركیا ل 81 ههرێمان برێڤهبچن و تێدا پارتا داد و گهشهپێدان دێ بزاڤان كهت جارهكا دى هندهك باژێڕڤانییان وهكى باژێڕڤانیێن ستهنبۆل و ئهنقهره بۆ دهستههلاتا خۆ بڤهگهڕینیت ل دهمهكێ پارتا گهل یا كۆمارى دێ ههمى بزاڤان كهت جارهكا دى دهستههلاتا خۆ ل وان باژێڕڤانییان بپارێزیت.
ل گۆرهى راپۆرتهكا مالپهرێ Alghad tv؛ ل رۆژا ئێكشهمبیێ ل ههرێمێن رۆژههلاتێ توركیا ژ دهمژمێر 7ى سپێدێ ههتا 4 ئێڤارى دێ ههلبژارتن برێڤهچن و ل جهێن دى یێن وهلاتى دێ ژ دهمژمێر 8ى سپێدێ ههتا 5ى ئێڤارى برێڤهچن و دهێته چاڤهرێكرن ل ههمان رۆژ ل دهمژمێر 10ى شهڤێ ل گۆرهى دهمێ توركیا ئهنجامێن دهستپێكی یێن ههلبژارتنان بهێنه راگههاندن.
ديار ژى كریه "دهێته چاڤهرێكرن ههڤڕكییهكا مهزن دناڤبهرا داد و گهشهپێدان و پارتا گهل یا كۆمارى و ب تایبهت دناڤبهرا ئهكرهم ئیمام ئوغلۆ بهربژارێ جهههپه و موراد قوروم بهربژارێ ئاكهپه دا ههبیت، گرنگییا ستهنبۆلێ د وێ چهندێ دایه كو پتر ژ 16 ملیۆن كهسان لێ دژین و ئهو چالاكى لێ دهێنه كرن یێن پتر ژ چارێكا سهرجهمێ بهرههمێ ناڤخۆیى یێ توركیا پێكدئینن".
خۆیا ژى كریه "ل گۆرهى راپرسییان، بهربژارێ پارتا گهل یا كۆمارى ب جوداهییهكا كێم ژ بهرى بهربژارێ داد و گهشهپێدانه".
د ههلبژارتنێن باژێڕڤانییان یێن سالا 2019 دا، ئهكرهم ئیمام ئوغلۆ بهربژارێ جهههپه هێزا ئوپوزیسیۆنێ یا سهرهكى د ههلبژارتنان دا بسهركهفتبوو، ههروهسا جهههپه شیابوو ل ئهنقهره ژى دهستههلاتدارییا ئاكهپه یا چهندین سالان ڤهكێشاى ب دویماهیك بینیت.
ئهردۆگانى كاروانێ خۆ یێ سیاسى ل سالا 1994 دهستپێكربوو دهمێ ئهو ل وێ سالێ سهرۆكێ باژێڕڤانییا ستهنبۆلێ بووى و د نوكه دا ئهو سهرۆككۆمارێ توركیایه و چاڤێ پارتا وى ل سهر ڤهگهڕاندنا باژێڕڤانییا ستهنبۆلێ یه.
ل گۆرهى جڤاتا بلند یا ههلبژارتنان یا توركى؛ نزیكى 11 ملیۆن دهنگدهران مافێ دهنگدانێ ل ستهنبۆلێ ههنه.
د ههلبژارتنێن پهرلهمانێ توركیا یێن گۆلانا سالا بۆرى دا، ئهردۆگان دوباره وهك سهرۆك هاتبوو ههلبژارتن و ههڤپهیمانییا وى پترییا كورسیێن پهرلهمانى بدهستڤهئینابوون، پشتى وان ئهنجامان ژى، دابهشبوون دناڤبهرا ههڤپهیمانییا پارتا گهل یا كۆمارى و هندهك پارتێن دى یێن ئوپوزیسیۆنێ دا رویدابوون، راپۆرتا وى مالپهرى زێده كریه.
گرنگییا ستهنبۆلێ چییه؟
ههر ل گۆرهى راپۆرتا Alghad tv؛ بودجهیا ستهنبۆلێ گهلهك ژ یا ههر 80 باژێڕێن دى پتره كو دگههیته پتر ژ 16 ملیار دۆلاران د سالا 2024 دا.
ئاماژه ب وێ چهندێ ژى كریه "برێڤهبرنا باژێڕێن مهزن ژ لایێ حزبان ڤه ل گهل بودجهیا وان باژێڕان، دبیته ئهگهرێ وێ چهندێ حزب كونترۆلێ ل سهر پارهداركرنێ، گرێبهستان و دهلیڤهیێن كارى بكهن و ئهڤ چهنده هێزا وان یا جهماوهرى ل سهر ئاستێ وهلاتى زێدهتر دكهت".
هندهك چاڤدێر دبینن كو ئهگهر ئهكرهم ئیمام ئوغلۆ بهربژارێ جهههپه دوباره ل ستهنبۆلێ د ههلبژارتنان دا بسهركهفت، ئهو دێ خۆ بۆ ههلبژارتنێن سهرۆكاتییا توركیا یێن بهێت بهربژار كهت، وهكى وى مالپهرى دیاركرى.