ئيران: مه ب بهایێ 15 ملیار دۆلاران غاز فرۆشتیه ئیراقێ
گاڤ
ئیرانێ راگههاند كو وێ ههر ژ سالا 2017 ههتا نوكه ب بهایێ 15 ملیار دۆلاران غاز بۆ ئیراقێ هنارده كریه.
مهجید جغنى جێگرێ وهزیرێ كاروبارێن پهترۆل و غازێ یێ ئیرانێ ئهڤرۆ پێنجشهمبیێ بۆ ئاژانسا مهر یا ئیرانى راگههاند "ئیرانێ نزیكى 52 ملیار مترێن سێجاركى یێن غازێ ب بهایێ 15 ملیار دۆلاران ههر ژ تیرمهها سالا 2017 ههتا نوكه ل گۆرهى دو گرێبهستێن غازێ بۆ ئیراقێ هنارده كرینه".
وهزارهتا كارهبێ یا ئیراقێ دوهى چارشهمبیێ ئیمزاكرنا گرێبهستهكا نوى بۆ هاوردهكرنا غازێ ژ ئیرانێ بۆ دهمێ پێنج سالێن بهێت راگههاند بوو.
زیاد عهلى فازل وهزیرێ كارهبێ یێ ئیراقێ بۆ وێ ئاژانسا ئیرانى گۆت "ل گۆرهى گرێبهستێ بۆ دهمێ 5 سالێن بهێت ئیراق دێ غازێ ژ ئیرانێ كڕیت".
ئیراق پێدڤى ب 35 هزار مێگاواتێن كارهبێ یه رۆژانه و ل گۆرهى راپۆرتان؛ ئیراق پترییا پێدڤیاتییا خۆ بۆ بهرههمئینانا كارهبێ ب رێكا غازا ئیرانى پڕ دكهت.