پرۆژەیاسایەک: زیندانی دێ ب پارە هێنە ئازادکرن
گاڤ
ل پەرلەمانێ ئیراقێ پرۆژەیاسایەک بۆ کێمکرنا قەرەبالغێ د زیندانان دا هاتییە ئامادەکرن و ل گۆرەی وێ پرۆژەیاسایێ، هندەک ژ زیندانییان دشێن ئازادییا خۆ بکڕن.
ژمارەکا پەرلەمانتارێن ئیراقێ پرۆژەیاسایەک بۆ کێمکرنا قەرەبالغێ د زیندانان دا ئامادە کرییە، د وێ پرۆژەیاسایێ دا هاتییە پێشنیازکرن زیندانییێن حوکمێن وان 3 سال و کێمتر بشێن ئازادییا خۆ بکڕن، هەر رۆژەک ب 10 هزار دینارێن ئیراقی.
د پرۆژەیاسایێ دا هندەک مەرجێن دی ژی هەنە، ژ وان، زیندانی ب تاوانێن گرێدایی بازرگانییێ ب ماددەیێن هشبەر نەهاتبیتە حوکمکرن، هەروەسا پێشتر نەهاتبیتە زیندانکرن و چ لێبۆرینان ژێ نەگرتبیت و کەسێ سکالا ل سەر تۆمار کری، ژ مافێ خۆ لێ خۆش ببیت.
ئەڤ پرۆژەیاسایە د دەمەکی دایە کو ل زیندانێن ئیراقێ ژبەر زێدەبوونا تاوانێ و نەبوونا ئاڤاهییێن بکێرهاتی بۆ زیندانان، قەرەبالغەکا زێدە دروست بوویە و بەردەوام بۆ دەولەتێ کێشە ژ وێ قەرەبالغێ دروست دبن.