ئهرێ راسته سودانى پۆستێن خۆ يێن بهرێ ل دۆر بهايێ دۆلارى ژێبرينه؟
گاڤ
بكارهينهرێن سوشيال ميديايێ يێن ئيراقى د دهمژمێرێن بوورى دا نووچهيهك ل دۆر ژێبرنا ژمارهكا پۆستان ژلایێ سهرۆكوهزيرێ ئيراقێ ل دۆر كێمكرنا بهايێ دۆلارى بهرانبهر دينارى بهلاڤكرينه.
محهمهد شياع سودانى ل دهمێ پهرلهمانتار، وى ژمارهيهكا پۆستان ژ بۆ داخوازكرنا كێمكرنا بهايێ دۆلارى بهرانبهر دينارى پشتى بڕيارا بهنكا ناڤهندى ل 19ى كانوينا ئێكێ يا سالا 2020 ب بلندكرنا بهايێ دۆلارى بهرانبهر دينارى بهلاڤكربوون.
مالپهرێ ”بغداد اليوم” بهلاڤكريه؛ ژمارهيهكا بكارهينهرێن سوشيال ميديايێ دياركرينه كو سودانى پۆستێن خۆ يێن بهرێ ل دۆر بهايێ دۆلارى ژێبرينه و هندهكێن دى ڤێ چهندێ رهتدكهن.
ديار ژى كريه؛ سودانى ل 24ى ئادارا سالا 2021ێ ل سهر مالپهرێ خۆ يێ فهرمى د فهيسبووكى دا پۆستهك بهلاڤكربوو و تێدا گۆتبوو "شۆڕهشا برسيان دێ هێت ئهگهر بهايێ دۆلارى نههێته كێمكرن"، لێ پشتى دويڤچوونا مالپهرێ وى يێ فهيسبووكى دياربوو كو ئهو پۆسته تێدا نهمايه و وى ژێبريه.
خۆيا ژى كريه؛ ل رێكهفتى 24/3/2021 ب تنێ دو پۆست د مالپهرێ سودانى يێ فهيسبووكى دا ههنه ئهو ژى ئێك ژ وان كو ئهو دێ مێهڤانێ بهرنامهيهكێ تهلهفزيۆنى بيت و يێ دى پشكداريا وى د بهرنامهيهكێ دا ل دۆر ههلبژارتنان بوون.
ل گهل هندێ ئاماژه دايه وێ چهندێ ژى كو سودانى ههمى پۆستێن بهرێ ل دۆر بهايێ دولارى ژێنهبرينه بهلكو هندهك ژ وان ژێبرينه.
ئاشكرا ژى كريه؛ ل رێكهفتێ 22/3/2021 سودانى تويتهك بهلاڤكربوو و تا نوكه د مالپهرێ وى يێ تويتهرى دا مايه و نههاتيه ژێبرن.
د دهقێ وێ تويتێ دا هاتبوو "ژ بۆ حكومهتێ و جهێن شولهژێ، ركمانى بلا بهس بيت، پێدڤيه بهايێ دولارى بۆ بهايێ بهرێ بهێته ڤهگهڕاندن، چونكى دێ بيته ئهگهرێ شۆڕشا برسيان و تێچوويێ ڤێ چهندێ چهندين جاران ژ جوداهيا مفايێ بهايێ نوى پتره".
ل 19/12/2020 بهنكا ناڤهندى يا ئيراقى بڕيارا گوهۆڕينا بهايێ دولارى بهرانبهر دينارى ژ 1200 ديناران بۆ دولارهكێ ژ بۆ 1450 ديناران بۆ دولارهكێ دابوو.
ئهڤرۆ و دوهى بهايێ دولارى ل ههرێما كوردستانێ و ئيراقێ بلندبوونهكا بهرچاڤ ب خۆڤه ديتيه و ل بهغدا ئهڤرۆ دوشهمبيێ بهايێ 100 دولاران گههشتبوو 158 هزار ديناران.