سهرۆكێ ئۆكراینا ب فهرمى دهستپێكرنا هێرشا ههڤدژ ل دژى هێزێن رۆسى راگههاند
گاڤ
سهرۆكێ ئۆكراینا ئهڤرۆ شهمبیێ ب فهرمى هێرشا ههڤدژ یا هێزێن ئۆكراینى ل دژى هێزێن رۆسى راگههاند.
دهمهكێ درێژ بوو كیێڤێ بهرههڤى بۆ ئهنجامدانا هێرشا ههڤدژ ل سهر وان دهڤهرێن هێزێن رۆسى كونترۆلكرین ل دونێتسك، لوهانسك، خێرسۆن و زاپۆریژیا ژ بۆ ڤهگهڕاندنا وان دهڤهران بۆ بن كونترۆلا ئۆكراینا دكرن و سهرۆكێ ئۆكراینا ئهڤرۆ ب فهرمى دیاركر كو هێرشێ دهستپێكریه.
ئاژانسا BBC ژ ڤولودیمیر زێلێنسكى ڤهگوهاستیه "شۆڕهشا ههڤدژ ههروهسا كارێن بهڕهڤانیێ د بهردهوامن".
لێ زێلێنسكى دیاركر كو ئهو ب درێژى ل سهر وێ چهندێ نائاخڤیت كا شۆڕهشا ههڤدژ گههشتیه كیژ قووناغێ.
ل سهر ئاستێ مهیدانى، هێزێن ئۆكراینى ل رۆژههلاتى ل نزیك باژێڕێ باخمۆت ل دونێتسك ههروهسا ل باشوورى ل نزیك زاپۆریژیا د پێشرهویێ دانه و هێرشێن دویر مهودا ل سهر هێزێن رۆسى كرینه.
ههروهسا پهیڤدارهكێ لهشكهرى یێ ئۆكراینى ئهڤرۆ شهمبیێ راگههاند كو هێزێن ئۆكراینى ل ژمارهیهكا دهڤهران ل نزیك باخمۆت ل رۆژههلاتێ وهلاتى ب نزیكى 1400 كیلۆمهتران پێشرهوى كرینه.
ڤلادیمیر پۆتین سهرۆكێ رۆسیا ژ لایێ خۆڤه ل دوهى ئهینیێ دیاركربوو كو ئهو ب فهرمى رادگههینن كو هێرشا ههڤدژ یا ئۆكراینى دهستپێكریه.
ههڤدهم زێلێنسكى ئهڤرۆ شهمبیێ ل كیێڤێ پێشوازى ل جوستین ترۆدۆ سهرۆكوهزیرێ كهنهدا كر و ههردو لایهنان رهوشا ئۆكراینا و ژمارهیهكا بابهتێن دى بهحسكرن.