وهلاتهكێ ژ بهر پێلا دژوار یا گهرمییێ قۆتابخانه داخستن
گاڤ
دهستههلاتێن بهنگلادشێ بڕیارا داخستنا قۆتابخانهیان ژ بهر پێلا گهرمییێ یا دژوار ل وى وهلاتى دان.
بهنگلادش رویبروى دژوارترین پێلا گهرمییێ د ماوهیێ 30 سالێن بۆرى دا دبیت، دهستههلاتێن بهنگلادشێ ژى بڕیار دان قۆتابخانهیان ههتا رۆژا شهمبییێ ل ههمبهر 33 ملیۆن قۆتابییان بگرن.
وهزارهتا خواندنا بنهرهتى و جهماوهرى یا بهنگلادشێ راگههاندیه؛ پترییا سازیێن فێركرنێ دێ ههتا 27ى نیسانێ د داخستى بن، وهكى رۆژنامهیا ئیندێپێندێنت یا بریتانى ئاماژهپێكرى.
ئهڤ سالا دوێ یه ل دویڤ ئێك ژ بهر پێلا گهرمییێ قۆتابخانه ل بهنگلادش دهێنه داخستن ژ بۆ پاراستنا زارۆكان ژ گهرمییا دژوار.
ههروهسا دهستپێكرنا پێلا گهرمییێ ل دهمهكێ ب لهز كارتێكرن ل سهر بهرههمێ چاندنێ ل وى وهلاتى كریه.
ل گۆرهى سهقاناسییا بهنگلادشێ؛ تێكرایێ پلهیا گهرمییێ ل دهكا یا پایتهخت د حهفتییا بۆرى دا ب 4 تا 5 پلهیێن سهدى ژ تێكرایێ پلهیێن گهرمییێ یێ 30 سالێن بۆرى زێدهتر بوو.
بلندترین پلهیا گهرمییێ ل بهنگلادش ل دهڤهرا چوادانگا د بێهنڤهدانا دویماهییا حهفتییا بۆرى دا هاتیه تۆماركرن كو 42.2 پلهیێن سهدى بوون، ل دهمهكێ پلهیا گهرمیێ ل دهكا یا پایتهخت 40.4 پلهیێن سهدى بوون.
ب كێماسى نههـ كهسان ل بهنگلادش ژ بهر پێلا گهرمییێ یا ڤێ حهفتییێ گیانێ خۆ ژدهستداینه، وهكى ئاژانسێن نووچهیان دیاركرین.