ههولێر و بهغدا بڕيار دان لژنهيهكێ بۆ دويڤچوونا پشكا ههرێمێ د بودجهيێ دا پێكبينن
گاڤ
شاندهكێ حكومهتا ههرێمێ ل دۆر رهشنڤيسا پرۆژهياسايا بودجهيا 2023 يا ئيراقێ ل گهل شاندهكێ حكومهتا فيدرالى كۆمبوو و ههردو لايان بڕيار دان لژنهيهكێ بۆ دويڤچوونا پشكا ههرێمێ د بودجهيێ دا پێكبينن.
د راگههاندنهكا حكومهتا ههرێما كوردستانێ دا هاتيه؛ شاندهكێ حكومهتا ههرێمێ ئهڤرۆ ئێكشهمبيێ سهرهدانا بهغدا كرن و ل گهل شاندهكێ حكومهتا فيدرالى گۆتوبێژ ل دۆر ئامادهكاريێن نڤيسينا رهشنڤيسا بودجهيا سالا 2023 كرن.
تێدا هاتيه ژى؛ ههروهسا دانوستاندن ل دۆر پشكا ههرێما كوردستانێ د ياسايا بودجهيا سالا 2023 يا ئيراقێ دا هاته كرن و بڕيار هاته لژنهيهك بهێته پێكئينان و دهست ب كارێن خۆ بكهت.
بهيانێ ديار ژى كريه؛ شاندێ حكومهتا ههرێما كوردستانێ بهرههڤيا خۆ دهربڕى كو ل سهر بنياتێ دهستوورى ههمى كێشهيێن ههلاويستێ يێن دناڤبهرا ههولێر و بهغدا دا ب رێكا دانوستاندنێ بهێنه چارهسهركرن.
شاندێ حكومهتا ههرێمێ ژ د. دارا رهشيد وهزيرێ پلاندانانێ، كهمال محهمهد وهزيرێ سامانێن سرۆشتى ب وهكالهت، د. ئومێد سهباح سهرۆكێ ديوانا جڤاتا وهزيران، د. ئامانج رهحيم سكرتێرێ جڤاتا وهزيران، د. عهبدولحهكيم خهسرهو سهرۆكێ فهرمانگهها ههماههنگى و دويڤچوونێ، د. جۆتيار عادل پهيڤدارێ حكومهتا ههرێمێ و سهرۆكێ فهرمانگهها ميديا و زانيارى، فارس عيسا سهرۆكێ نوينهرايهتيا حكومهتا ههرێمێ ل بهغدا و تيمێن وهزارهتا دارايى و سامانێن سرۆشتى يا ههرێمێ پێكدهات.
ههروهسا شاندێ حكومهتا فيدرالى ژ محهمهد تهميمى وهزيرێ پلاندانانێ، تهيف سامى وهزيرا دارايى و چهند كارمهندێن وهزارهتا دارايى يا فيدرالى پێكدهات.