"182 مليار دينار وهك پشكا ئێكێ ژ پارهيێن باجان يێن ل ئيراقێ هاتينه دزين هاتنه ڤهگهڕاندن"
گاڤ
سهرۆكوهزيرێ ئيراقێ ڤهگهڕاندنا 182 مليار ديناران وهك پشكا ئێكێ ژ پارهيێن باجان يێن ل ئيراقێ هاتينه دزين و ب ناڤێ دزيا چهرخى ناڤداربووى راگههاند.
محهمهد شياع سودانى د پهيامهكێ دا راگههاند؛ دهستهلاتێن تايبهتمهند شيان پشكا ئێكێ ژ پارهيێ باجان يێن هاتينه دزين كو پتر ژ 182 مليار دينارانه ڤهگهڕينن.
ديار ژى كر؛ لژنهيێن لێكۆلينێ دهست ب دويڤچوونا كهسێن ئهڤ كاره ئهنجامداين يان كهمتهرخهمى كرين پێكئينايه و ديار بوويه كو هندهك لايهن دناڤ دهستهيا باجان دا و هندهك سازيێن دويڤچوونێ و بهرپرسيار ئاسانكارى بۆ ڤى كارى كرينه.
سودانى خۆيا ژى كر؛ لژنه گههشتيه وى ئهنجامى كو 114 چێكێن بهنكى بۆ تۆمهتبار نور زهێر ب كۆژمهيێ پتر ژ ئێك ترليۆن ديناران ههروهسا 66 چهكێن بهنكى ب كۆژمهيێ 982 مليار ديناران بۆ كۆمپانيا ”الحوت الاحدب” كو رێڤهبهرێ كارگێرى يێ وێ عهبدولمههدى تهوفيقه كو رهڤيه و خۆدانێ وێ قاسم محهمهده، ههروهسا 37 چهكێن بهنكى ب كۆژمهيێ 624 مليار ديناران بۆ كۆمپانيا ”بادية المسار” كو رێڤهبهرێ وێ يێ كارگێرێ عهبدولمههدى تهوفيقه و خۆدانێ وێ عهبدولرهحمان محهمهد ئيبراهيمه و ههروهسا 45 چهكێن بهنكى ب كۆژمهيێ 607 مليار ديناران بۆ كۆمپانيا ”رياح بغداد” كو رێڤهبهرێ وێ يێ كارگێرى عهبدولمههدى تهوفيقه و خۆدانێ وێ حسێن كاوهيه كو ل ههرێما كوردستانێ هاتيه دهستهسهركرن، هاتينه خهرجكرن.
سودانى ئاماژه دا وێ چهندێ ژى كو سهرجهمێ پارهيێن هاتينه دزين 3 ترێليۆن و 754 مليار و 682 مليۆن و 664 هزار دينارن و داخواز ژ وان كهسێن فهرمانێن گرتنێ بۆ دهركهفتين كر كو خۆ رادهست بكهن.