گاڤ - تایبەت
پشتی مەکتەبێن رێکخستنێن پارێزگەهان هاتینە دانان و کۆنفرانسێن ناڤخۆیی هاتینە پاشخستن، بریارە ژمارەیەکا کارگێر لقێن چەندین سالن د پۆستێن خۆ دا ماین بهێنە گهۆرین.
ژێدەرەکێ ئاگەهدار بۆ گاڤ دیارکر؛ گهۆرینێن هژمارەیەکا کارگێر لقان خواستا کادرانە و پشتی مەکتەب رێکخستن هاتیە دانان، دهێتە چاڤەرێکرن هندەک ژ وان کارگێر لقان بۆ وێ مەکتەبێ بهێنە ڤەگوهاستن و ل جهێن وان ژی هژمارەیەکا کادرێن گەنج و ب ئەزموون و بەرپرسێن لژنێن ناڤخۆیی بهێنە دانان.
ژێدەرێ گاڤ دبێژیت: هەتا نوکەژی ستافێ مەکتەبا رێکخستنێ ل دهۆكێ ب تەمامی نەهاتیە دانان، لێ هێشتا ئەویەکژی نەهاتیە ئێکلاکرن کا ل هەر لقەکێ چەند کارگێر لق دێ هێنە گۆهرین و ب چ میکانزم.
ژێدەرێ گاڤ هه‌روه‌سا گۆت: کارگێرێن لقان و لژنان ب هەلبژارتن هاتینە دیارکرن، ژبەرکو کۆنگرەیێ نوی هاتیەکرن، لێ هەلبژارتن بۆ گۆهرینا کارگێر و کارگێر لژنان نەهاتینەکرن،لەو ئەو دەستهەلات ب مەکتەبا رێکخستنێ هاتیەدان کو گۆهرینێن پێدڤی بهێنەکرن. 
پشتى 12 سالان ژ نەگرێدانا کۆنگرەی، پارتی ل 3ى هه‌یڤا 11 یا سالا بوورى ل باژێری دهۆكێ کۆنگرەیێ خۆ یێ 14 گرێدا و د په‌یره‌وێ نوى یێ حزبێ دا ژمارا كارگێرێن لقان بۆ 6 كارگێران و یێن لژنه‌یان ژى بۆ 4 كارگێران هاتینه‌ كێمكرن.