گاڤ

چاڤى هێرناندێز راهێنه‌رێ به‌رشلۆنا كه‌فتیه‌ د ناكۆكییه‌كێ دا ل گه‌ل خوان لاپۆرتا سه‌رۆكێ یانه‌یێ ژ به‌ر ئێك ژ یاریكه‌ران.

به‌رشلۆنا ل هاڤینا بۆرى ب شێوه‌یێ خواستن هه‌ڤبه‌ست ل گه‌ل جواو فلێكس یاریكه‌رێ پورتۆگالى یێ ئه‌تلێتكۆ مه‌درید بۆ ماوه‌یێ هه‌تا دویماهییا ڤى وه‌رزى 2023-2024 ئیمزاكربوو.

به‌رنامه‌یێ ئێلچیرینگیتۆ یێ ئسپانى دیاركریه‌ "چاڤى راهێنه‌رێ به‌رشلۆما ل هاڤینا بۆرى ل سه‌ر گرێدانا هه‌ڤبه‌ستێ ل گه‌ل جواو فلێكس نه‌یێ رازیبوو و د نوكه‌ ژى دا ل سه‌ر به‌رده‌وامییا وى د به‌رشلۆنا دا ل وه‌رزێ بهێت یێ رازى نینه‌".

هه‌ر ل گۆره‌ى وى به‌رنامه‌ى "چاڤى دبینیت كو وى یاریكه‌رى به‌رده‌وامى نینه‌، د شیان دایه‌ ئه‌و ببیته‌ ئێك ژ یاریكه‌رێن مه‌زن لێ ئه‌و ب ته‌مامى مفاى ژ شیانێن خۆ نابینیت و ئه‌ڤ چه‌نده‌ یا هه‌ڤشێوه‌یه‌ ل گه‌ل وێ چه‌ندا ل گه‌ل وى یاریكه‌رێ پورتۆگالى د ئه‌تلێتیكۆ مه‌درید دا ژى رویداى".

به‌رنامه‌ى ئاماژه‌ ب وێ چه‌ندێ ژى كریه‌ "خوان لاپۆرتا سه‌رۆكێ به‌رشلۆنا و دیكۆ رێڤه‌به‌رێ وه‌رزشى یێ یانه‌یێ حه‌ز دكه‌ن فلێكس به‌رده‌وام بیت و دێ گۆتوبێژان بۆ نویكرنا هه‌ڤبه‌ستا وى یا ب شێوه‌یێ خواستن كه‌ن و ئه‌ڤ چه‌نده‌ به‌روڤاژى حه‌زا چاڤى راهێنه‌رێ به‌رشلۆنایه‌".