سودانى 7 بريار بۆ بلندكرنا بهايێ دینارى ده‌رخستن
بەلاڤ بکە
گاڤ
سه‌رۆكوه‌زيرێ ئيراقێ حه‌فت بڕيار ژ بۆ بلندكرنا بهايێ دینارى ده‌رخستن.
سه‌رۆكوه‌زيرێ ئيراقێ ئه‌ڤرۆ ئێكشه‌مبيێ سه‌رۆكاتيا كۆمبوونه‌كێ ل گه‌ل ئێكه‌تيا ژوورێن بازرگانى يێن ئيراقى ل دۆر بابه‌تێ بلندبوونا بهايێ دۆلارى به‌رانبه‌ر دينارى كر.
د به‌يانه‌كا ئۆفيسا محه‌مه‌د شياع سودانى دا هاتيه؛ سه‌رۆكوه‌زيرێ ئيراقێ ژ بۆ چاره‌سه‌ركرنا كێشه‌يا بلندبوونا بهايێ دۆلارى به‌رانبه‌ر دينارى ئه‌ڤ بڕيارێن ل خوارێ دان:
1. ڤه‌كرنا فرۆشگه‌هه‌كا نوى بۆ فرۆشتنا دراڤێ بيانى بۆ بازرگانێن بچويك ب رێكا به‌نكا بازرگانى يا ئيراقى TBI.
2. ته‌مويلكرنا به‌نكا ناڤه‌ندى بۆ به‌نكا بازرگانى يا ئيراقى ب كۆژمه‌يه‌كێ زێده‌تر يێ 500 مليۆن دۆلاران.
3. ده‌ستپێكرنا هاورده‌كرنا كه‌لوپه‌لان ژ لايێ كۆمپانيێن تۆماركرى ژ لايێ رێڤه‌به‌ريا تۆماركرنا كۆمپانيان ل وه‌زاره‌تا بازرگانى هه‌روه‌سا كۆمپانيێن ل ده‌ف رێڤه‌به‌ريا گشتى يا گه‌شه‌پێدانا پيشه‌سازى هاتينه تۆماركرن زێده‌بارى ئۆفيس و تاكه‌كه‌سێن ل ده‌ف ژوورا بازرگانى تۆماركرى.
4. بساناهيكرنا رێكارێن هاورده‌كرنێ و هه‌لوه‌شاندنا گشتاندنا ده‌سته‌يا گشتى يا باجان يا ل دۆر سه‌پاندنا غه‌رامه‌يێن گيرۆكرنێ.
5. پشكداريپێكرنا ژوورێن بازرگانى و ئێكه‌تيا پيشه‌سازيان د روينشتنێن جڤاتا وه‌زارى يا ئابوورى دا وه‌ك نوينه‌رێن كه‌رتێ تايبه‌ت.
6. حه‌فتيانه دێ كۆمبوون ژ بۆ دويڤچوونا بجهئينانا ڤان بڕياران هێته كرن.
7. زێده‌كرنا رێڤه‌به‌ريا تۆماركرنا خانوبه‌ران بۆ ڤێ كۆمبوونێ هه‌روه‌سا تۆماركه‌رێ كۆمپانيان، گه‌شه‌پێدانا پيشه‌سازى، ده‌سته‌يا وه‌به‌رهێنانێ و به‌نكێن رافيده‌ين و ره‌شيد.
