د سالهكێ دا نزیكى 282 ملیۆن مرۆڤ ل جیهانێ پێدڤى ب هاریكاریێن خۆراكى یێن ب لهز بوون
گاڤ
د سالا بۆرى دا نزیكى 282 ملیۆن مرۆڤ ل سهرانسهرى جیهانێ ژ بهر ئالۆزی و شهڕهنیخان و گوهۆڕینێن سهقاى و قهیرانێن ئابوورى پێدڤى ب هاریكاریێن مرۆڤایهتى یێن ب لهز یێن خوارنێ بوون.
تۆڕا جیهانى یا بهرسینگگرتنا قهیرانێن خۆراكى كو ژ 16 رێكخراوێن گرێداى نهتهوهیێن ئێكگرتى و رێكخراوێن مرۆڤایهتى پێكدهێت د راپۆرتهكێ دا ل دۆر ئێمناهییا خۆراكى د سالا بۆرى 2023 دا دیاركریه "د وێ سالێ دا، نهبوونا ئاساییشا خۆراكى ل جیهانێ زێدهتر لێهاتیه و نزیكى 282 ملیۆن كهسان ل جیهانێ پێدڤی ب هاریكاریێن خۆراكى یێن ب لهز بوون".
ئاماژه ب وێ چهندێ ژى كریه "پێدڤیبوونا نزیكى 282 ملیۆن كهسان بۆ هاریكاریێن خۆراكى ژ بهر شهڕهنیخان و ب تایبهت ل غهزه و سوودانێ ههروهسا ژ بهر گوهۆڕینێن سهقاى و قهیرانێن ئابوورى بوو".
ب ڤێ چهندێ، ژمارهیا كهسێن د سالا 2023 دا پێدڤى ب هاریكاریێن خۆراكى یێن ب لهز بووین، ب 24 ملیۆن كهسان ب ههڤبهركرن ل گهل سالا 2022 زێدهتر بوویه.
ل گۆرهى راپۆرتێ "تا نوكه ئاسۆ د روهن نینن بۆ ئهڤ ساله و ئهڤه سالا پێنجێ ل دویڤ ئێكه ژمارهیا كهسێن ژ نهبوونا ئاساییشا خۆراكى یا دژوار دنالن بهرهڤ زێدهبوونێ ڤه دچیت كو تێدا ژیانا كهسى یان رێكێن ژیارا وى ژ بهر نهگههشتنا خوارنا پێدڤى بۆ وى رویبروى مهترسییێ دبیت".
ههر ژ سالا 2016 ل دهمێ دهستپێكرنا بهلاڤكرنا ڤێ راپۆرتا ل دۆر ئێمناهییا خۆراكى ل جیهانێ، ژمارهیا كهسێن ژ نهبوونا ئاساییشا خۆراكى دنالن ژ 108 ملیۆن كهسان بۆ 282 ملیۆن كهسان زێدهبوویه.