ڤاكسینه‌كێ جۆره‌كێ په‌نجه‌شێرا مێشكى ئه‌نجامێن سه‌رنجراكێش د تاقیكرنان دا بده‌ستڤه‌ئیناینه
بەلاڤ بکە
گاڤ
ڤاكسینه‌كێ نوى شیایه د تاقیكرنان دا ئه‌نجامێن سه‌رنجراكێش د چاره‌كرنا جۆره‌كێ نه‌خۆشییا په‌نجه‌شێرا مێشكى دا بده‌ستڤه‌بینیت.
د تاقیكرنێن كلینكى دا ل سه‌ر چار نه‌خۆشان، ڤاكسینێ نوى شیایه ئه‌نجامێن سه‌رنجراكێش د به‌رسینگگرتنا جۆره‌كێ په‌نجه‌شێرا مێشكى یا ب ناڤێ (گلیۆبلاستۆماس) دا بده‌ستڤه‌بینیت.
ل گۆره‌ى مالپه‌رێ ساینس ئه‌لێرت "ڤاكسینێ نوى یێ په‌نجه‌شێرێ پشتبه‌ستنێ ل سه‌ر هه‌مان ته‌كنولۆژیایێ دكه‌ت یا د ڤاكسینێن كۆڤید-19 دا هاتیه بكارئینان لێ ل گه‌ل هنده‌ك گوهۆڕینێن سه‌ره‌كى".
ڤاكسینێ نوى هاریكارییا سیسته‌مێ به‌رگرییا له‌شى ژ بۆ نیاسینا وه‌رمینا پیس دكه‌ت و ژماره‌یه‌كا زانیارییان ل دۆر وه‌رمینێ دده‌تێ دا كو هێرشه‌كا سه‌ركه‌فتی دژى په‌نجه‌شێرێ ئه‌نجامبده‌ت.
د تاقیكرنێن كلینیكى یێن نوى دا، 4 تووشبوویێن وێ نه‌خۆشییێ دو قۆرچ یان چار قۆرچ ژ ڤاكسینى وه‌رگرتن و ڤاكسینى ئه‌نجامێن باش د تاقیكرنان دا بده‌ستڤه‌ئینان.
ئێلایس سیۆر زانایێ وه‌رمینان و شاره‌زا د لێكۆلینێن ڤاكسینان دا ل زانكۆیا فلۆریدا د ڤى ده‌رباره‌ى دا دبێژیت "ئه‌نجام د نه پێشبینیكرى بوون ژ به‌ر له‌زاتییا ده‌ستپێكرنا هێرشا به‌رگرییا له‌شى و ئه‌ڤ چه‌نده گه‌له‌ك یا گرنگه بۆ ئاشكراكرنا كارتێكرنێن بهێت یێن به‌رسڤدانا به‌رگرییا له‌شى".
