مه‌سروور بارزانى: پێدڤیه ب زووترین ده‌م هنارتنا په‌ترۆلا هه‌رێمێ ده‌ستپێبكه‌ت
بەلاڤ بکە
گاڤ
سه‌رۆكوه‌زیرێن هه‌رێما كوردستانێ ل گه‌ل جێگرێ سه‌رۆكوه‌زیران و وه‌زیرێ په‌ترۆلا ئیراقێ و شانده‌كا ل گه‌ل دا كۆمبوو، دانوستاندن ل دۆر هنارتنا په‌ترۆلا هه‌رێما كوردستانێ هاتنه كرن.
ل گۆڕه‌ى راگه‌هاندنه‌كا جڤاتا وه‌زیران ئه‌ڤرۆ سه‌رۆكوه‌زیرێن هه‌رێما كوردستانێ، مه‌سروور بارزانى ل گه‌ل جێگرێ سه‌رۆكوه‌زیران و وه‌زیرێ په‌ترۆلا ئیراقێ، حه‌یان عه‌بدولغه‌نى و شانده‌كا ل گه‌ل كو ژ بریكار و رێڤه‌به‌رێ گشتى یێ وه‌زاره‌تێ و رێڤه‌به‌رێ گشتى یێ كۆمپانیا سۆمۆ پێكهاتبوون، كۆمبوو.
سه‌رۆكێ حكومه‌تا هه‌رێما كوردستانی ئاماده‌ییا هه‌رێمێ بۆ ده‌ستپێكرنا هنارتنا په‌ترۆلا هه‌رێمێ دوپاتكر و ئه‌ڤ یه‌كه ژى د چارچووڤێ لێكتێگه‌هشته‌كا هه‌ڤپشك ب ئاراسته‌یێ بجهئینانا پێدڤیێن درایى و ته‌كنیكى یێن پرۆسه‌یا هنارتنێ و د چارچووڤێ بنه‌مایێن ده‌ستوورى و گرێبه‌ستان و رێزگرتن ل ده‌ستهه‌لات و مافێن ده‌ستوورى یێن هه‌رێما كوردستانێ و دیتنا چاره‌یەکا گونجایى بۆ ده‌سته‌به‌ركرنا خه‌رجیێن به‌رهه‌مئیانێ و ڤه‌گوهاستنا په‌ترۆلا هه‌رێمێ د ناڤا بودجه‌یا ئیراقێ دا كو ته‌رخانكریێن پێدڤى بۆهاتیه دانان.
سه‌رۆكێ حكومه‌تێ دیاركریه، راوه‌ستاندنا په‌ترۆلا هه‌رێمێ زیانێن چه‌ندین ملیار دۆلاران ب گه‌نجینه‌یا گشتى گه‌هاندینه و پێدڤیه ب زووترین ده‌م هنارتنا وێ ده‌ستپێبكه‌ت.
هه‌ر د ڤى وارى دا وه‌زیرێ سامانێن سروشتى یێ هه‌رێما کوردستانێ راسپارد هاریكاریا ته‌مام ل گه‌ل تیمێ وه‌زاره‌تا په‌ترۆلا ئیراقێ بكه‌ن كو بۆ ده‌ما چه‌ند رۆژه‌كان دێ ل هه‌ولێرێ بمینن.
