گاڤ

ل سالا 2023یێ ل سەرتاسەری جیهانێ ل ئیراقێ ژ هەموو وەلاتان پتر ئینتەرنێت ژ وەلاتیان هاتیە بڕین و ل ژمارەکا دی یا وەلاتێن رۆژهەلاتا ناڤین و ئەرەبی بۆ نەهێلانا بەرفرەهبوونا خۆنیشانانان ئینتەرنێت ژ وەلاتیان هاتیە بڕین.

مالپەڕێ "مدل ئیست ئای" یێ بریتانی ل گۆرەی ڤەکۆلینەکا مالپەڕێ "ڤی پی ئێن تۆپ تێن" راگەهاند: ل سالا 2023یێ ل ئیراقێ 66 جاران ئینتەرنێت ژ وەلاتیان هاتیە بڕین و بڕینا ئینتەرنێتێ ب بەهانەیا بەرهنگاریا قۆپیایێ د ئەزموونێن قوتابیان دابوو، لێ ل گۆرەی چالاکڤانێن مافێ مرۆڤی، بڕینا ئینتەرنێتێ بنپێکرنا مافێن مرۆڤی یە.

ل هەرێما کوردستانێ و ئیراقێ دەما چەندین سالانە بڕینا ئینتەرنێتێ وەک رێیەک بۆ بەرهنگاریا قۆپیایێ دهێتە بکارئینان و هەرچەندە نەرازیبوون و رەخنە ل ناڤخۆ و ژدەرڤە هەنە، لێ تا سالا 2023یێ ژی ئەو کار هاتیە کرن.

هەر ل سالا 2023یێ، ئیرانێ چەندین جاران ئینتەرنێت ژ وەلاتیێن خۆ بڕیە داکو کونترۆلا خۆنیشانانان بکەت و ل جەزائر، سوودان، یەمەن، سووریا و تورکیا ژی ئەو کار هاتیە کرن.