گاڤ

ده‌سته‌یا ئه‌لمانى یا لێكۆلینێن نڤستنێ و پزیشكیا نڤستنێ دیاركر كو نڤستنا كێم دبیته‌ ئه‌گه‌رێ زێده‌بوونا مه‌ترسیا تووشبوونێ ب نه‌خۆشیێن دلى و بلندبوونا فشارا خوینێ.

ده‌سته‌یێ ئاماژه‌ ب وێ چه‌ندێ كریه‌ "نڤستنا كێم دبیته‌ ئه‌گه‌رێ دروستبوونا هنده‌ك مولێكیولسان كو هێرشێ ل سه‌ر شانه‌یان و خانه‌یان دكه‌ن و مه‌ترسیا ره‌قبوونا بۆریێن خوینێ زێده‌ دكه‌ن كو ئێك ژ ئه‌گه‌رێن سه‌ره‌كى یێن ژماره‌یه‌كا نه‌خۆشیێن دلى و بۆریێن خوینێ یه‌".

ئه‌و ده‌سته‌یه‌ دیار دكه‌ت كو ل وى ده‌مى تێكچوونا نڤستنێ هه‌یه‌ ده‌مێ مرۆڤ ب زه‌حمه‌ت بشێت بنڤیت یان ژى ب زه‌حمه‌ت بمینیته‌ نڤستى، ئه‌ڤ چه‌نده‌ ب تێكرایێ نه‌كێمتر ژ 3 جاران ل حه‌فتیێ بۆ ده‌مێ هه‌یڤه‌كێ یان پتر.

ژ بۆ خۆپاراستنێ ژ مه‌ترسیێن كێمخه‌ویێ، ده‌سته‌یێ شیره‌تكر مرۆڤ شه‌ڤانه نه‌كێمتر ژ 6 ده‌مژمێران هه‌تا 8 ده‌مژمێران بنڤیت.

نڤستنا ساخله‌م دبیته‌ ئه‌گه‌رێ كێمبوونا تێكرایێ لێدانێن دلى و نزمبوونا فشارا خوینێ هه‌روه‌سا باشتركرنا هه‌رسكرنێ، بهێزبوونا به‌رگریا له‌شى و چاكبوونا خانه‌یان و بله‌زبوونا چاكبوونا برینان.