ئیران: ئەمریکا لیستا جهێن هێرش کریێ پێشوەخت دابوو مە
بەلاڤ بکە
گاڤ
رۆژنامەیەکا کوێتی هەبوونا رێککەفتنا پێشوەخت د ناڤبەرا ئەمریکا و ئیرانێ دا بەری هێرشێن دوماهیا حەفتیا بۆری ئاشکرا دکەت و ئیران ژ بنپێکرنا وێ رێککەفتنێ ژ ئالیێ ئەمریکا ڤە دلگرانە.
رۆژنامەیا "الجريدة" یا کوێتی راگەهاند: بەری هێرشا ئەمریکا یا شەڤا ئەینی ل سەر شەمبیا بۆری، رێککەفتنەک د ناڤبەرا ئیرانێ و ئەمریکا دا هەبوو و سەرکردەیەکێ سوپایێ پاسداران دبێژیت "واشنتونێ پێشوەخت لیستا وان جهێن دێ ل ئیراقێ و سووریێ هێرش کەتە سەر، دابوو تەهرانێ، لێ ئەمریکا هندەک جهـ کرینە ئارمانج کو د لیستێ دا نەبوون".
هەرچەندە تا نوکە ئەمریکا چ نووچە دەربارەی هەبوونا رێککەفتنێن پێشوەخت ب فەرمی رانەگەهاندینە، لێ ئەو سەرکردەیێ پاسداران بۆ رۆژنامەیا "الجريدة" دبێژیت: پێدڤی بوو پێگیری ب رێککەفتنان بهێتە کرن.
هەرچەندە ئەمریکا و ئیران خۆ ب دوژمنێن هەڤدو ددەنە نیاسین، لێ پشتی دەستپێکرنا شەڕێ ئسرائیل و حەماسێ، نە ئەمریکا چ بنگەهێن ئیرانی ل ناڤ وی وەلاتی کرینە ئارمانج و نەژی سوپایێ ئیرانێ ب رەنگەکێ ئێکسەر هێرش کریە سەربازگەهـ یان کەشتیێن ئەمریکی. یا تا نوکە هەیی، ئیران ب رێکا حۆسیان ل دەریا سۆر و ب رێکا گرۆپێن حەشدا شەعبی ل ئیراقێ هێرش دکەتە سەربازگەهێن ئەمریکی و ئەمریکا ژی هێرشێن ل دژی ئیرانێ ل ئیراق، سووریا و یەمەنێ دکەت.
