ناڤه‌ڕۆكا كۆمبوونا مه‌سروور بارزانى و وه‌زیرێ به‌رگریا توركیا
بەلاڤ بکە
گاڤ
مه‌سروور بارزانى، سه‌رۆكێ حكومه‌تا هه‌رێما كوردستانێ و یه‌شار گوله‌ر، وه‌زیرێ به‌رگریا توركیا كۆمبوون، حكومه‌تا هه‌رێما كوردستانێ دبێژیت: مه‌سروور بارزانى دوپاتكریه، هه‌رێم نابیته گه‌ف ل سه‌ر جیرانان.
ئه‌ڤرۆ چارشه‌مبێ 7-2-2024ێ مه‌سروور بارزانى، سه‌رۆكێ حكومه‌تا هه‌رێما كوردستانێ ل گه‌ل یه‌شار گوله‌ر، وه‌زیرێ به‌رگریا توركیا و شانده‌كێ ل گه‌ل دا كۆمبوو، حكومه‌تا هه‌رێما كوردستانێ راگه‌هاندنه‌ك ل دۆر ناڤه‌ڕۆكا كۆمبوونێ به‌لاڤكر و دیاركر، د كۆمبوونێ دا دانوستاندن ل دۆر ره‌وشا گشتى یا ئیراقێ و گرنگیدان ب په‌یوه‌ندیێن توركیا و هه‌رێما كوردستانێ هاتیه‌كرن.
هه‌روه‌سا دیاركریه، دوپاتى ل گرنیگدان ب به‌رده‌وامبوونا هه‌ڤكاری و هه‌ماهه‌نگیا هه‌ڤپشك بۆ پاراستنا ئاسایش و ئارامیا هه‌رێما كوردستانێ و ئیراقێ و ناوچێ هاتیه‌كرن.
هه‌ر د راگه‌هاندنا حكومه‌تێ دا هاتیه، وه‌زیرێ به‌رگریا توركیا به‌هیدارى و هه‌ڤخه‌میا خۆ بۆ ژیان ژ ده‌ستدانا قوربانیێن هێرشا هه‌ولێرێ ده‌ربڕیه و ئاماژه دایه كو هێرشێ چ به‌هانه نه‌بووینه.
ژ ئالیێ خۆڤه مه‌سروور بارزانى هه‌ر وه‌ك د راگه‌هاندنێ دا هاتى خواستا هه‌رێما كوردستانێ بۆ به‌رده‌ومیدان ب په‌یوه‌ندیێن هه‌ردو ئالیان لسه‌ر بنه‌مایێ جیرانیه‌كا باش و به‌رژه‌وه‌ندیا هه‌ر دو ئالیان دوپاتكریه و گۆتیه: هه‌رێما كوردستانێ وه‌ك هه‌ر ده‌م دێ بیته فاكته‌رێ ئاسایش و سه‌قامگێریێ و رێكێ ژى ناده‌ت ببیته جهێ گه‌فێ و مه‌ترسیێ بۆ جیرانان.
گرنگیا بجهئینانا رێككه‌فتنا شنگال و ئاسایكرنا ره‌وشا ده‌ڤه‌رێ و ڤه‌گه‌ڕاندنا ئاواره‌یان بۆ جهێن وان ته‌وه‌ره‌كێ دى یێ كۆمبوونا سه‌رۆكێ حكومه‌تێ و وه‌زیرێ به‌رگریا توركیا بوون.
