گاڤ 

مەکتەبا سیاسی یا پارتی دیمۆکراتی کوردستان ئەڤرۆ ب سەرپەرشتیا سەرۆک بارزانی دەربارەی بریارێن دادگەها فیدرال کۆمبوو و پشتی کۆمبوونێ رگەهاند: پشتەڤانیا پارتی ل حکومەتا هەرێما کوردستانێ و پێکهاتەیێن هەرێما کوردستانێ بەردەوامە.

مەکتەبا سیاسی یا پارتی دیمۆکراتی کوردستان راگەهاند: ئەڤرۆ رۆژا پێنجشەمبی 22ی شواتا سالا 2024ێ مەکتەبا سیاسی یا پارتی دیمۆکراتی کوردستان ب سەرپەرشتیا سەرۆک مەسعوود بارزانی کۆمبوو و پشتی کۆمبوونێ راگەهاندنەکا سێ خالی بەلاڤ کر کو د خالا ئێکێ دا هاتیە: پارتی دوپاتیێ ل مافێن پێکهاتەیان و پشکداریا وان د سازیێن دەستووری دا دکەت.

د خالا دویێ یا راگەهاندنا پارتی دا دوپاتی ل پشتەڤانیا حکومەتا هەرێما کوردستانێ هاتیە کرن و پارتی راگەهاندیە: پارتی دێ پشتەڤانیا حکومەتا هەرێما کوردستانێ کەت تاکو ل گەل حکومەتا فیدرال یا ئیراقێ بەردەوامیێ بدەتە دانوستاندنان ل سەر شایستەیێن دارایی یێن هەرێما کوردستانێ د چارچووڤەیێ دەستووری دا.

د خالا سێیێ دا پارتی نەرازیبوونا خۆ ژ بریارا دادگەها فیدرال یا گرێدای یاسایا هەلبژارتنێن پەڕلەمانێ کوردستانێ دیار کریە و راگەهاندیە: بریارا دادگەها فیدرال یا گرێدای یاسایا ژمارە (1) یا سالا 1992یێ یا هەلبژارتنان و گوهۆڕینا پشکەکێ ژ بڕگەیێن وێ، هەڤدژی دەستووری و ژێکجوداکرنا دەستهەلاتانە.

دوهی دادگەها فیدرال دو بریار ل سەر هەرێما کوردستانێ دان، د بریارا ئێکێ دا هەردو حکومەتێن هەرێما کوردستانێ و فیدرال راسپاردن کو مووچەیێ مووچەخۆرێن هەرێما کوردستانێ مەهانە بدەن و د بریارا دویێ دا، هندەک پشک ژ یاسایا هەلبژارتنێن هەرێما کوردستانێ یا سالا 1992یێ ب نەدەستووری ناڤ کرن و راگەهاند: پێدڤیە کورسیێن کۆتا یێن پێکهاتەیان کو 11 کورسینە، ل پەرلەمانێ کوردستانێ نەمینن و ژمارەیا کورسیێن پەرلەمانێ کوردستانێ ژ 111 کورسیان بۆ 100 کورسیان بهێنە کێمکرن.