گاڤ

وه‌زاره‌تا ناڤخۆ یا ئیراقێ ئه‌ڤرۆ شه‌مبیێ راگه‌هاند كو تا نوكه‌ 36 ملیۆن ئیراقیان كارتا نیشتیمانى تۆماركرینه‌.

میقداد میرى په‌یڤدارى وه‌زاره‌تا ناڤخۆ یا ئیراقێ و شانه‌یا راگه‌هاندنا ئه‌منى د به‌یانه‌كێ دا دیاركر "رێڤه‌به‌ریا بارێ شارستانى و پاسپۆرت و ئاكنجیبوونێ د وه‌زاره‌تا ناڤخۆ دا تۆماركرنا 36 ملیۆن وه‌لاتیان بۆ كارتا نیشتیمانى هه‌تا رۆژا 1ى ڤێ ئادارێ راگه‌هاند‌".

وه‌زاره‌تا ناڤخۆ یا ئیراقێ ل 27ى كانوینا ئێكی یا سالا 2023 راگه‌هاند بوو كو هه‌ر ژ 1ى ئادارا سالا 2024 دێ كارتا نیشیمانى بیته‌ به‌لگه‌نامه‌یا ئێكانه‌، پاشى ل رۆژا 19ى شوباتا بۆرى وه‌زاره‌تا ناڤخۆ كاركرن ب به‌لگه‌نامه‌یێن دى هه‌تا 1ى نیسانا بهێت درێژكر دا كو پتر وه‌لاتى كارتا نیشتیمانى تۆمار بكه‌ن و هه‌ر 1ى نیسانێ كارتا نیشتیمانى دێ بیته‌ به‌لگه‌نامه‌یا ئێكانه‌.

حكومه‌تا ئیراقێ ل سالا 2015 پرۆژه‌یێ كارتا نیشتیمانى راگه‌هاند بوو دا كو ببیته‌ پێگوهۆڕ بۆ به‌لگه‌نامه‌یێن دى وه‌كى ناسنامه‌یا بارێ شارستانى، ره‌گه‌زنامه‌یا ئیراقى، كارتا ئاكنجیبوونێ و پلێتا ئاهێن خوارنێ.

ئارمانج ژ پرۆژه‌یێ كارتا نیشتیمانى ئه‌وه‌ داتابه‌یسه‌كێ ناڤه‌ندى بۆ هه‌مى ئیراقیان و كارته‌كا ئێكگرتى بۆ وان بهێته‌ دروستكرن دا كو وێ كارتێ د مامه‌له‌یان دا ل هه‌مى سازى و داموده‌زگه‌هێن فه‌رمى بكاربینن.