فراكسیۆنا پارتى: بڕیارێن دادگه‌ها فیدرالى ژ ده‌ستوورى د دویرن
بەلاڤ بکە
گاڤ
فراكسیۆنا پارتى دیمۆكراتى كوردستان د په‌رله‌مانێ ئیراقێ دا بڕیارێن دادگه‌ها فیدرالى یا ئیراقێ ب بڕیارێن دویر ژ گیانێ ده‌ستوورى لقه‌له‌مدان.
د به‌یانه‌كا فراكسیۆنا پارتى ئه‌ڤرۆ 21/3/2024 دا هاتیه "نه‌ورۆزا ئه‌ڤ ساله هه‌ڤده‌مه ل گه‌ل ده‌ربازبوونا ئیراقێ د ژماره‌یه‌كا ئاریشه‌یان دا وه‌كى بڕیارێن دادگه‌ها فیدرالى یێن دویر ژ گیانێ ده‌ستوورى".
دیار ژى كریه "بڕیارێن دادگه‌ها فیدرالى بووینه ئه‌گه‌رێ مایتێكرنێ د كاروبارێن هه‌رێما كوردستانێ دا و كونترۆلكرنا كاروبار و سازیێن وێ و سه‌پاندنا ده‌ستهه‌لاتا ناڤه‌ندى ل سه‌ر هه‌رێمێ".
فراكسیۆنا پارتى ئاماژه ب وێ چه‌ندێ ژى كریه "بڕیارێن ڤێ دویماهیێ یێن دادگه‌ها فیدرالى د دویرن ژ رێككه‌فتنێن دناڤبه‌را لایه‌نێن هه‌ڤپه‌یمانییا برێڤه‌برنا ده‌وله‌تێ دا به‌رى پێكئینانا حكومه‌تا نوكه و ده‌نگدانێ ل سه‌ر به‌رنامه‌یێ حكومى".
فراكسیۆنا پارتى داخوازا ڤه‌گه‌ڕیانێ بۆ رێككه‌فتنا هه‌ڤپه‌یمانییا برێڤه‌برنا ده‌وله‌تێ كریه ژ بۆ ب دویماهیك ئینانا قه‌یرانا دناڤبه‌را هه‌رێمێ و ئیراقێ دا، دا كو ئیراق به‌ره‌ڤ ره‌وشه‌كا نه‌دیار و ئالۆز ڤه نه‌چیت.
