دانوستاندنێن ههولێر - بهغدا بۆ هنارتنا پشكا مایى ژ مووچهیێن مووچهخۆرێن ههرێمێ د بهردهوامن
گاڤ
دانوستاندنێن ههولێر – بهغدا ل دۆر هنارتنا پشكا مایى ژ مووچهیێن مووچهخۆرێن ههرێمێ د بهردهوامن و چاڤهرێ دهێته كرن ل نزیك بگههنه رێككهفتنێ.
پهرلهمانتار د. خهلیل غازى ئهڤرۆ پێنجشهمبیێ بۆ گاڤ راگههاند "دانوستاندنێن حكومهتا ههرێمێ و حكومهتا فیدرالى بۆ هنارتنا پشكا مایى ژ مووچهیێن مووچهخۆرێن ههرێمێ د بهردهوامن".
ديار ژى كر "دویماهیك بڕێ پارهی یێ بهغدا هنارتى بۆ مووچهیێن زیندانیێن سیاسى و شههیدان بوو و دهێته چاڤهرێكرن ههردو لایهن بگههنه رێككهفتنێ ل دۆر پشكا مایى یا مووچهیان".
حكومهتا ئیراقێ تا نوكه پتر ژ 600 ملیار دیناران بۆ مووچهیێن مووچهخۆرێن ههرێمێ بۆ ههیڤا شوباتێ یا بۆرى هنارتینه، دویماهیك كۆژمهیێ هاتیه هنارتن ژى 37 ملیار و 123 ملیۆنێن بۆ مووچهیێن كهسوكارێن شههیدان و ئهنفالكرییان و زیندانیێن سیاسى بوون، لێ ل گۆرهى حكومهتا ههرێما كوردستانێ هێشتا كورتئینان بۆ دابهشكرنا مووچهیان ههیه.
حكومهتا ئیراقێ بهرى نوكه راگههاند بوو كو پارهداركرنا ههرێما كوردستانێ دێ بهردهوام بیت و وهزارهتا دارایى یا ئیراقێ یا پێگیره ب پارهداركرنا ههرێما كوردستانێ.
باسم عهوادى پهیڤدارێ حكومهتا ئیراقێ راگههاند بوو كو پارهداركرنا مووچهیێن فهرمانبهرێن ههرێما كوردستانێ ل گۆرهى رێكارێن نوكه و ب ههڤكارى ل گهل حكومهتا ههرێمێ دێ بهردهوام بیت و چ راستى بۆ راوهستاندنا پارهداركرنێ نینن.