سه‌رۆك بارزانى: دگه‌ل كرنا هه‌لبژارتناینه لێ دویر ژ ده‌ستوه‌ردرانێن ده‌ره‌كى و بڕیارێن سیاسى یێن دادگه‌ها فیدرال
بەلاڤ بکە
بالیۆزێ بریتانیا: پرۆسه‌یا هه‌لبژارتنان ل هه‌رێما كوردستانێ بێى پارتى پرۆسه‌یه‌كا كامل نابیت
ئه‌ڤرۆ ل سه‌لاحه‌دین، سه‌رۆك مه‌سعوود بارزانى پێشه‌وازی ل ستیڤن هیچن باڵیۆزێ بریتانیا ل ئیراقێ كر، د دیدارێ دا باس ل ره‌وشا سیاسسیا ئیراقێ و هه‌رێما كوردستانێ و هه‌لبژارتنێن په‌ڕله‌مانێ كوردستانێ هاته كرن.
د دیدارێ دا ،سه‌رۆك بارزانى دوپاتكر، هه‌ر ژ سالا 1991ێ پارتى ده‌ستپێشخه‌را هه‌لبژارتنان و ڤه‌گوهاستنا شه‌رعییه‌تا شۆڕشگێڕى بۆ شه‌رعییه‌تا یاسایی بوویه و د هه‌لبژارتنان ژى دا هه‌رده‌م ده‌نگێن ئێكێ ئیناینه.
سه‌رۆك بارزانى گۆت ژى، ماوه‌یێ دو سالانه ب به‌هانه‌یێن جودا جودا یێن سیاسى و هاندانا ده‌ستێ ده‌ره‌كى هه‌لبژارتن دهێنه پاشخستن، نها ژى كو ب بڕیارا سیاسییا دادگه‌ها فیدرال و ل گۆره‌ى ئه‌جێندایێن ده‌ره‌كى، ده‌ستكارییا یاسایا هه‌لبژارتنان هاتییه كرن، ژ نوى یێ دبێژن بلا هه‌لبژارتن بهێته كرن. سه‌رۆك مه‌سعوود بارزانى دوپاتكر ژى، ئه‌و خوازیارێن برێڤه‌چوونا هه‌لبژارتنانه لێ دویر ژ ده‌ستوه‌ردرانێن ده‌ره‌كى و بڕیارێن سیاسى یێن مه‌به‌ستدار یێن دادگه‌ها فیدرال كو ئارمانج ژ ێ شكاندنا پارتى بیت.
سه‌رۆك بارزانى هه‌روه‌سا راگه‌هاند، ئه‌و ناچنه ژێر بارێ بڕیارێن نه ده‌ستوورى یێن دادگه‌ها فیدرال كو تێدا دادگه‌هێ خۆ دانایه جهێ ده‌ستهه‌لاتا یاسادانان و بجهئینانێ، گۆت ژى، تێبینی و داخوازێن پارتى یاسایینه، دچارچووڤه‌یێ ده‌ستوورى و بۆ برێڤه‌چوونا هه‌لبژاتنه‌كا راست و ره‌وا و پاقژن.
د پشكه‌كا دى یا گۆتنێن خۆ دا سه‌رۆك بارزانى باس ل سیاسه‌تا برسیكرن و بڕینا بودجه‌یا خه‌لكێ كوردستانێ كر و گۆت، نابیت سه‌ره‌ده‌ریا سیاسى دگه‌ل بودجه و قویتێ و خه‌لكێ كوردستانێ بهێته كرن بۆ لاوازكرن و شكاندنا ئیراده‌یا خه‌لكێ كوردستانێ و ب فه‌ر زانى چاره‌سه‌ریه‌كا ئێكلاكه‌ر بۆ مژارا بودجه‌یا هه‌رێمێ بهێته دیتن.
د دیدارێ دا بالیۆزێ بریتانیا ل ئیراقێ دوپاتى ل وێ ئێكێ كر، وه‌لاتێ وى ژ ده‌ستپێكا سالێن نۆتان یێن سه‌دسالا بۆرى تا نها ب گرنگى ل هه‌رێما كوردستانێ دنێڕیت و پشته‌ڤانێن هه‌رێمێنه و دگه‌ل هه‌رێمه‌كا كوردستانێ یا بهێز و سه‌قامگیرن، دیاركر ژى رۆلێ پارتى د پرۆسه‌یا سیاسى یا ئیراقێ و هه‌رێما كوردستانێ دا گرنگه و پرۆسه‌یا هه‌لبژارتنان ل هه‌رێما كوردستانێ بێى پارتى پرۆسه‌یه‌كا كامل نابیت، و دخوازن هاریكرا بن بۆ چاره‌سه‌كرنا كێشه‌یان.
بالیۆزێ بریتانیا راگه‌هاند ژى، ئه‌و د دلگرانیێن سه‌رۆك بارزانى دگه‌هن و بۆ وێ ئێكێ هاتینه داپشكدار و هاریكار بن بۆ برێڤه‌چوونا هه‌لبژارتنه‌كا پاقژ.
