گاڤ

سه‌رۆكوه‌زیرێ ئیراقێ پشتى ب دویماهیك هاتنا سه‌ره‌دانا وى بۆ ئه‌مریكا ئه‌ڤرۆ شه‌مبیێ ڤه‌گه‌ڕیاڤه‌ ئیراقێ.

د سه‌ره‌دانێ دا، ژماره‌یه‌كا یاداشتنامه‌یێن لێكتێگه‌هشتنێ دناڤبه‌را ئیراقێ و كۆمپانیێن ئه‌مریكى دا هاتنه‌ ئیمزاكرن هه‌روه‌سا ته‌وه‌رێ سه‌ره‌كى یێ سه‌ره‌دانێ پێشڤه‌برنا په‌یوه‌ندیێن ئابوورى بوو كو ئێك ژ ته‌وه‌رێن رێككه‌فتنا چارچووڤه‌یێ ستراتیژى یا سالا 2008 دناڤبه‌را ئیراقێ و ئه‌مریكا دا، ته‌وه‌رێ ئابوورى یه‌.

سه‌ره‌دانا محه‌مه‌د شیاع سوودانى سه‌رۆكوه‌زیرێ ئیراقێ بۆ ئه‌مریكا شه‌ش رۆژان ڤه‌كێشا و تێدا ژماره‌یه‌كا دیداران ل گه‌ل به‌رپرسێن ئه‌مریكی و ب تایبه‌ت جۆ بایدن سه‌رۆكێ ئه‌مریكا، ئه‌نتۆنى بلینكن وه‌زیرێ ده‌رڤه‌ یێ ئه‌مریكا و لوید ئوستن وه‌زیرێ به‌ره‌ڤانیێ یێ ئه‌مریكا ئه‌نجامدان.

سه‌رۆكوه‌زیرێ ئیراقێ دوپاتكر كو ب سه‌ره‌دانا وى بۆ ئه‌مریكا لاپه‌ره‌كێ نوى د په‌یوه‌ندیێن ئیراقێ و ئه‌مریكا دا ڤه‌بوو.