سه‌رۆك نێچیرڤان بارزانى: پشته‌ڤانییا ته‌مام ل ئازادییا رۆژنامه‌ڤانى و راده‌ربڕینێ دكه‌ین
بەلاڤ بکە
گاڤ
سه‌رۆك نێچیرڤان بارزانى په‌یامه‌ك ب هه‌لكه‌فتا 126مین سالیادا رۆژنامه‌گه‌رییا كوردى دا به‌لاڤكر و راگه‌هاند، دڤێت ئالیێن په‌یوه‌ندیدار ل گۆڕه‌یى قانوونا رۆژنامه‌ڤانى ل كوردستانێ مامه‌لێ ل گه‌ل هه‌ر كه‌یسه‌كا د وارێ رۆژنامه‌ڤانى دا بكه‌ن.
ئه‌ڤرۆ 22-4-2024ێ سه‌رۆك نێچیرڤان بارزانى په‌یامه‌ك به‌لاڤكر و دبێژیت: 126 مین سالیادا رۆژا رۆژنامه‌گه‌رییا كوردى و ده‌رچوونا ئێكه‌م ژماره‌یا رۆژنامه‌یا كوردستان ژ ئالیێ میر میقداد به‌درخان ڤه و 26مین سالیادا سه‌ندیكا رۆژنامه‌ڤانێن كوردستانێ ب گه‌رمى ل ته‌ماما رۆژنامه‌ڤانان پیرۆزكر و هیڤییا سه‌ركه‌فتنێ بۆ خواست.
نێچیرڤان بارزانى، سه‌رۆكێ هه‌رێما كوردستانێ د ڤێ یادێ دا دوپاتى ل زه‌مینه و ژینگه‌هه‌كا هانده‌ر بۆ كارێ میدیایى، كارئاسانى بۆ گه‌هشتنا ژێده‌رێن زانیارییان بێ جوداهى ب رۆژنامه‌ڤانان و دویركه‌فتن ژ سه‌پاندن و سانسۆركرنێ بۆ وێ یه‌كێ رۆژنامه‌ڤان به‌رپرسیارانه رۆلێ پیشه‌یى یێ خۆ د چاڤدێریكرنا سازییان و بلندكرنا ئاستێ هشیارییا خه‌لكى و دروستكرنا رایا گشتى دا ببینن و ببنه فاكته‌ر و هاریكاره‌كا گرنگ بۆ پرۆسه‌یا ئاڤاكرن و گه‌شه‌كرنا دیمۆكراسیێ و ڤه‌كرنێ د ناڤا كۆمه‌لگه‌هێ دا.
هه‌روه‌سا سه‌رۆك بارزانى دبێژیت: ل ده‌مه‌كى پشته‌ڤانییا ته‌مام بۆ رۆژنامه‌ڤانان، باوه‌ریه‌كا نه‌گۆر ب ئازادییا رۆژنامه‌ڤانى و راده‌ربڕینێ وه‌ك بنه‌مایه‌كێ سه‌ره‌كى یێ هه‌ر كۆمه‌لگه‌هه‌كا دیمۆكرات و ئازادیخواز دوپات دكه‌ین، داخواز ژى ژ رۆژنامه‌ڤانان كر پابه‌ندى قانوونێن كارێ رۆژنامه‌ڤانى و ئیتیكێ رۆژنامه‌ڤانى بن ل ئاست راستگۆیى، هه‌ڤسه‌نگى، بێلایه‌نى و دویركه‌فتن ژ نووچه‌یێن سه‌خت و زمانێ ره‌ق، هه‌روه‌سا هانده‌رێن پاراستنا ئاشتییا جڤاكى و سه‌قامگێرییا سیاسى و پارێزه‌رییا به‌رژه‌وه‌ندیێن گه‌ل و نشتیمانى بكه‌ن.
رۆلێ رێكخستنێن ناڤخۆ و نێڤده‌وله‌تى ب تایبه‌ت بۆ چاڤدێریكرنا ره‌وشا ئازادییا رۆژنامه‌گه‌رى و راده‌ربڕینێ ل هه‌رێما كوردستانێ بلند نرخاند و دوپاتكر، دڤێت ئالیێن په‌یوه‌ندیدار ل گۆڕه‌یى قانوونا رۆژنامه‌گه‌رى ل كوردستانێ مامه‌لێ ل گه‌ل هه‌ر كه‌یسه‌كا د وارێ رۆژنامه‌ڤانى دا بكه‌ن.
سلاڤ ژى بۆ رۆژنامه‌ڤانێن شه‌هید و وان رۆژنامه‌ڤانان هه‌بوون یین د ده‌مێ شۆڕش و ئازادیێ دا ژیانا خۆ بۆ گه‌هاندنا راستیێ و پێشخستنا رۆژنامه‌ڤانییا كوردستانێ ته‌رخانكرى.
