یاداشتنامهیهكا لێكتێگههشتنێ دناڤبهرا چار وهلاتان دا بۆ ههڤكاریێ د پرۆژهیێ رێكا گهشهپێدانێ دا هاته ئیمزاكرن
گاڤ
سهرۆكوهزیرێ ئیراقێ و سهرۆكێ توركیا چاڤدێرییا ئیمزاكرنا یاداشتنامهیا لێكتێگههشتنێ یا چارقوولى دناڤبهرا ئیراقێ و توركیا و قهتهر و ئیماراتێ دا بۆ ههڤكاریێ د پرۆژهیێ رێكا گهشهپێدانی دا كرن.
پرۆژهیێ رێكا گهشهپێدانێ پرۆژهیهكێ بازرگانى و ئابوورى یه و ب رێكا هێلهكا شهمهندهفڕێ و هێلهكا ئهردى یا ب لهز كهنداڤێ عهرهبى ب ئیراقێ و توركیا و پاشى ئهورۆپا ڤه گرێددهت.
ل گۆرهى بهیانهكا ئۆفیسا سوودانى "محهمهد شیاع سوودانى سهرۆكوهزیرێ ئیراقێ و رهجهب تهیب ئهردۆگان سهرۆككۆمارێ توركیا ئهڤرۆ دوشهمبییێ چاڤدێرییا رێورهسمێن ئیمزاكرنا یاداشتنامهیا لێكتێگههشتنێ یا چارچوولى دناڤبهرا ئیراق، توركیا، قهتهر و ئیماراتێ دا كرن كو ئارمانج ژێ ههڤكارییا ههڤپشكه ل دۆر پرۆژهیێ رێكا گهشهپێدانێ یێ ستراتیژى، ئهندامێن شاندێن توركى و ئیراقى ژ وهزیر و شیرهتكاران د رێورهسمان دا پشكدار ببوون".
بهیانێ دیار ژى كریه "یاداشتنامهیا لێكتێگههشتنێ ژ لایهنێ ئیراقى ژ لایێ رهزاق محێبس وهزیرێ ڤهگوهاستنێ، ژ لایهنێ توركى ژ لایێ عهبدولقادر ئورال ئوغلۆ وهزیرێ ڤهگوهاستنێ، ههروهسا ژ لایهنێ قهتهرى ژ لایێ جاسم بن سهیف ئهلسلێتى و ژ لایهنێ ئیماراتى ژ لایێ سوهێل محهمهد مهزروعى ڤه هاته ئیمزاكرن".
رهجهب تهیب ئهردۆگان سهرۆككۆمارێ توركیا د سهرهدانهكێ دا ل بهغدایه و دێ سهرهدانا ههولێرێ ژى كهت.
محهمهد شیاع سوودانى سهرۆكوهزیرێ ئیراقێ د دهمهكێ دى دا ژ ئهڤرۆ د پرێس كۆنفرانسهكێ ههڤپشك دا ل گهل رهجهب تهیب ئهردۆگان سهرۆككۆمارێ توركیا ل بهغدا راگههاند؛ ئیراقێ زێدهتر ژ 24 یاداشتنامهیێن لێكتێگههشتنێ و رێككهفتنا چارچووڤهیێ ستراتیژى ل گهل توركیا ئیمزاكرن.