گاڤ

ئیراقێ و توركیا رێككه‌فتنه‌كا 10 سالى ل دۆر ئاڤێ ئیمزاكرن و ئۆفیسا سه‌رۆكوه‌زیرێ ئیراقێ گرنگترین ئارمانج و بڕگه‌یێن وێ ئاشكراكرن.

ئۆفیسا محه‌مه‌د شیاع سوودانى سه‌رۆكوه‌زیرێ ئیراقێ د به‌یانه‌كێ دا گرنگترین خالێن رێكه‌فتنا چارچووڤه‌یێ هه‌ڤكاریێ د بیاڤێ ئاڤێ دناڤبه‌را ئیراقێ و توركیا دا ئاشكراكرن.

ل گۆره‌ى به‌یانه‌كا ئۆفیسا سوودانى "ئارمانجێن رێككه‌فتنا چارچووڤه‌یێ هه‌ڤكارییێ د بیاڤێ ئاڤێ دناڤبه‌را ئیراقێ و توركیا دا ئه‌ڤه‌نه‌:

- پێشڤه‌برنا رێكێن لێكتێگه‌هشتنێ و هه‌ڤكارییێ د بیاڤێ ئاڤێ دا ل سه‌ر بنیاتێ یه‌كسانیێ، نیازێن باش و جیرانییا باش.

- دانانا دیتنه‌كا نوى بۆ بجهئینانا پرۆژه‌یێن ژێرخانه‌یێ و وه‌به‌رهێنانێ بۆ ژێده‌رێن ئاڤێ ل ئیراقێ.

- پشتبه‌ستن ل سه‌ر دیتنه‌كێ بهێته‌ كرن كو ئارمانج ژێ دادپه‌روه‌رییه‌ د ئاڤێ دا.

- دانانا دیتنه‌كێ بۆ بكارئینانا ئاڤێ ب رێكه‌كا باش و كاریگه‌ر".

دیار ژى كریه‌ "هه‌روه‌سا هنده‌ك بڕگه‌یێن رێككه‌فتنێ پێكدهێن ژ:

- هه‌ڤكارى ب رێكا پرۆژه‌یێن هه‌ڤپشك بۆ باشتركرنا برێڤه‌برنا ئاڤێ ل دیجله‌ و فووراتى.

- داخوازكرنا كۆمپانییێن توركى بۆ هه‌ڤكارییێ د ژێرخانه‌یا پرۆژه‌یێن ئاڤدێریێ دا وه‌كى سیسته‌مێ كۆمكرنا ئاڤێ و به‌نداڤان، دانانا وێستگه‌هێن پالاوتنا ئاڤێ و پرۆژه‌یێن پاقژكرنا ئاڤێ.

- بجهئینانا پرۆژه‌یێن لێكگوهارتنا شاره‌زاییان و بكارئینانا سیسته‌م و ئالاڤێن ئاڤدێریێ یێن نوى و داخستى".

ئۆفیسا سوودانى ئاشكرا ژى كریه‌ كو رێككه‌فتنا ئیراقێ و توركیا یا ئاڤێ بۆ ده‌مێ 10 سالان دێ به‌رده‌وام بیت و هه‌ر جار ئوتۆماتیكى ب ساله‌كێ دێ هێته‌ درێژكرن، ئه‌ڤ چه‌نده‌ پشتى رازیبوونا هه‌ردو لایه‌نان.

ره‌جه‌ب ته‌یب ئه‌ردۆگان سه‌رۆككۆمارێ توركیا ئه‌ڤرۆ دوشه‌مبیێ سه‌ره‌دانا به‌غدا و پاشى هه‌ولێرێ كر و ل به‌غدا 24 یاداشتنامه‌یێن لێكتێگه‌هشتنێ و 2 رێككه‌فتن دناڤبه‌را ئیراقێ و توركیا دا هاتنه‌ ئیمزاكرن.