راگههاندنهك ژ سهرۆكایهتییا ههرێما كوردستانێ ل دۆر سهرهدانا ئهردۆگانى
گاڤ
سەرۆکایەتییا هەرێما کوردستانێ راگههاند؛ سهرۆككۆمارێ توركیا پشتەڤانییا وەلاتێ خۆ بۆ هەرێما کوردستانێ دوپاتکر.
ل ئێڤارییا ئهڤرۆ دوشهمبییێ د چارچووڤهیێ سهرهدانا رهجهب تهیب ئهردۆگان سهرۆككۆمارێ توركیا و شاندهكێ ل گهل دا بۆ ئیراقێ، ئهردۆگان گههشتبوو ههرێما كوردستانێ و ل فڕۆكهخانهیا ههولێرێ یا نێڤدهولهتى ژ لایێ نێچیرڤان بارزانى سهرۆكێ ههرێما كوردستانێ و مهسروور بارزانى سهرۆكێ حكومهتێ و ژمارهیهكا وهزیر و بهرپرسان ڤه پێشوازى لێ هاتبوو كرن.
سهرۆكایهتییا ههرێمێ راگههاند "د كۆمبوونهكێ دا، سهرهدانا ئهڤرۆ یا ئهردۆگانى ب بهغدا و دیدار و كۆمبوونێن وى ل گهل بهرپرسێن بلند یێن ئیراقا فیدرالى، پهیوهندیێن توركیا ل گهل ئیراقێ و ههرێما كوردستانێ و ب تایبهت د بوارێن ئابوورى، بازرگانى و هاریكارییا ئهمنى دا هاتنه بهحسكرن".
سهرۆكایهتییا ههرێما كوردستانێ د بهیانهكێ دا دیاركریه "د كۆمبوونهكێ دا، سهرۆك نێچیرڤان بارزانى حهزا ههرێما كوردستانێ بۆ پێشڤهبرنا پهیوهندییان ل گهل توركیا د ههمى بواران دا دهربڕى و دوپاتكر كو ههرێما كوردستانێ وهك ههردهم ل دهڤهرێ دێ فاكتهرێ ئارامى و سهقامگیریێ بیت".
دیار ژى كریه "ههروهسا سهرۆكێ ههرێما كوردستانێ سوپاسییا هاریكارى و پشتهڤانییا توركیا بۆ ههرێما كوردستانی د دهمێن سهخت دا كر".
سهرۆكایهتییا ههرێما كوردستانێ دیار ژى كریه "ههر د كۆمبوونێ دا، مهسروور بارزانى سهرۆكوهزیرێ ههرێما كوردستانێ دوپاتى ل سهر بهرههڤییا حكومهتا ههرێما كوردستانێ بۆ پێشڤهبرنا پهیوهندیییان و هاریكارییا ههڤپشك یا ئابوورى و بازرگانى ل گهل توركیا كر، ههروهسا بهحس ل دهلیڤهیێن كارى و وهبهرهێنانێ بۆ كۆمپانیێن توركى د ههمى بواران دا كر".
"ژ لایێ خۆڤه، سهرۆك ئهردۆگان بهردهوامییا پشتهڤانییا وهلاتێ خۆ بۆ ئیراقێ و ههرێما كوردستانێ دوپاتكر و بهرههڤییا وهلاتێ خۆ بۆ هاریكارییا ههڤپشك و پێشڤهبرنا پتر یا پهیوهندییان د ههمى بواران دا ل گهل ئیراقێ و ههرێما كوردستانێ نیشاندا، ههروهسا دوپاتى ل سهر گرنگییا پاراستنا ئارامى و سهقامگیریێ ل دهڤهرێ و چارهكرنا كێشهیان و مسۆگهركرنا مافێن پێكهاتهیان كر"، بهیانا سهرۆكایهتیێ زێدهكریه.
د بهیانێ دا هاتیه ژى "رێككهفتننامه و یاداشتنامهیێن لێكتێگههشتنێ دناڤبهرا توركیا و ئیراقێ دا، پاراستنا ئاسایشا سنوورى، بهرهنگاربوونا تیرۆرێ، دویماهیك پێشهاتێن دهڤهرێ ب گشتى و چهند بابهتێن دى یێن جهێ گرنگیپێدانا ههردو لایان تهوهرهكێ دى یێ كۆمبوونێ بوون".
سهرهدانا ئهردۆگانى بۆ ههولێرێ، ب ئێكهم سهرهدانا سهرۆككۆمارهكێ توركیا بۆ ههرێما كوردستانێ دهێته هژمارتن.
رهجهب تهیب ئهردۆگان سهرۆككۆمارێ توركیا پشتى ب دویماهیك هاتنا سهرهدانا بهغدا، ئهڤ شهڤه گههشتبوو ههولێرێ و ل فڕۆكهخانهیا ههولێرێ یا نێڤدهولهتى ژ لایێ نێچیرڤان بارزانى سهرۆكێ ههرێما كوردستانێ ڤه پێشوازى لێ هاتبوو كرن.
ههر ئهڤرۆ د سهرهدانا سهرۆككۆمارێ توركیا و شاندێ ل گهل دا بۆ بهغدا، 26 یاداشتنامهیێن لێكتێگههشتنێ و رێككهفتن دناڤبهرا ئیراقێ و توركیا دا هاتبوونه ئیمزاكرن.