گاڤ

فرۆشتنا ئه‌ندامێن له‌شى ل پارێزگه‌ها دهۆكێ زێده‌بوویه،‌ پارێزه‌ره‌ك ژى هۆشداریێ دده‌ت و دبێژیت: هه‌ر كه‌سێ بازرگانیێ ب ئه‌ندامێن له‌شێ مرۆڤى بكه‌ت، دێ هێته‌ سزادان، بازرگانه‌كێ گولچیسكان ژى بۆ گاڤ دبێژیت: نوكه‌ كته‌كا گولچیسكێ ب 3 ده‌فته‌رێن دۆلارى یه‌.

گاڤ دویفچوونا فرۆشتنا ئه‌ندامێن له‌شێ مرۆڤى ل پارێزگه‌ها دهۆكێ كر و ب به‌لگه‌ دیاربوویه‌ كو بازرگانییه‌كا مه‌زن پێ دهێته‌كرن.

پارێزه‌را شیره‌تكار، هه‌لات حه‌سه‌ن بۆ گاڤ دبێژیت: بازرگانیكرن ب گولچیسكان و ئه‌ندامێن له‌شێ مرۆڤان گه‌له‌ك به‌ربه‌لاڤ بوویه‌ و ل دادگه‌ها دهۆكێ هه‌ژمارا كه‌یسان گه‌له‌كن و دوپاتكر، دڤێت ل گۆڕه‌یى قانوونێ ئه‌ندامێن له‌شى بهێنە به‌خشین، بەرۆڤاژى هه‌ر كه‌سه‌كێ ئێكى ئستغلال بكه‌ت ل گۆڕه‌یى قانوونێ حه‌تا سێ سالان دێ هێتە زیندانکرن و ژ 20 تا 40 ملیۆن دیناران ژى دێ هێتە سزادان.

هەڤدەم كه‌سه‌ك كو کارێ بازرگانییا ئەندامێن لەشى دکەت بۆ گاڤ دبێژیت: نوكه‌ بهایێ گولچیسكەکێ زێده‌ترى 3 ده‌فته‌رێن دۆلارى یه‌، ئه‌و دبێژیت: ئه‌ڤه‌ دوازده‌ سالن ئه‌و وى كارى دكه‌ت و ئه‌گه‌ر گولچیسكه‌ك ژى ل گه‌ل نه‌خۆشه‌كى نه‌گونجیت ئێكسه‌ر ئه‌و كێشێ چاره‌ دكه‌ت و گولچیسكه‌كا دى بۆ وى په‌یدا دكه‌ت.