ئه‌ڤرۆ كۆربه‌ندێ ئابۆرى یێ جیهانى ل سعوودیێ ده‌ستپێدكه‌ت
بەلاڤ بکە
گاڤ
ئه‌ڤرۆ ئێكشه‌مبێ ب پشكدارییا محه‌مه‌د شیاع سوودانى، سه‌رۆكوه‌زیرێن ئیراقێ، ئه‌نتۆنى بلێنكن، وه‌زیرێ ده‌رڤه یێ ئه‌مریكا كۆربه‌ندێ ئابۆرى یێ جیهانى ل ریازا پایه‌ختێ سعوودیێ ده‌ستپێدكه‌ت و بۆ ده‌ما دو رۆژان ب ئاماده‌بوونا هزاران به‌رپرس، كه‌سایه‌تى، بازرگان و وه‌زیرێن ده‌رڤه دێ به‌رده‌وام بیت.
میدیایێن سعوودیێ دیاركریه، ل 92 وه‌لاتان هزار سه‌ركرده دێ پشكداریێ د كۆربه‌ندى دا كه‌ن و د ناڤا وان دا 20 وه‌زیرێن ده‌رڤه یێن وه‌لاتان هه‌نه، هه‌روه‌سا مه‌زنه بازرگان و وه‌به‌رهینه‌ر ژى دێ پشكداریێ د كۆربه‌ندى دا كه‌ن.
د كۆربه‌ندى دا بنه‌مایێن گرنگ دێ هێنه به‌حسكرن ژ وان ژى هاریكارى، هه‌ماهه‌نگییا نێڤده‌وله‌تى، گه‌شه‌یه‌كا زێده‌تر و تێهن ژبۆ گه‌شه‌كرن و گه‌شه‌پێدانێ.
هه‌روه‌سا ئه‌جێندایا كۆربه‌ندێ ریاز ژى چاره‌كرنا ئاسته‌نگ و كێشه‌یانه هه‌مبه‌رى وان وه‌لاتان یێن ده‌ستێ وان نه‌گه‌هیته ژێده‌رێن تێهنێ ژبه‌ر ناكۆكى و ئالۆزیێن ناوچێ و جیهانێ.
شه‌ڕێ غه‌زه، كارتێكرنا ئابۆرى، سیاسى و ئێمناهى ل سه‌ر رۆژهه‌لاتا ناڤین و جیهانێ ژى ته‌وه‌ره‌كی دى یێ كۆربه‌ندێ ریازه.
