گاڤ

بۆ رۆژا دووێ ل دویف ئێك سه‌رۆك نێچیرڤان بارزانى ل به‌غدایه‌، ئه‌ڤرۆ دێ ل گه‌ل سه‌رۆككۆمار و سه‌رۆكی جڤاتا بلندا دادوه‌رى كۆمبیت.

دڤێ مه‌هێ دا بۆ جارا دووێ یه‌ سه‌رۆكێ هه‌رێما كوردستانێ سه‌را به‌غدایێ دده‌ت 6-4-2024ێ سه‌ردانا پایته‌ختا ئیراقێ كر و پشكدارى د كۆمبوونا هه‌ڤپه‌یمانییا برێڤه‌برنا ده‌وله‌تێ دا كر.

ئه‌ڤرۆ ئێكشه‌مبێ نێچیرڤان بارزانى، سه‌رۆكێ هه‌رێما كوردستانێ دێ ل به‌غدایێ ل گه‌ل د. عه‌بدوللـه‌تیف ره‌شید، سه‌رۆككۆمارێ ئیراقێ و قایق زێدان، سه‌رۆكێ جڤاتا دادوه‌رى، عه‌مار حه‌كیم،  سه‌رۆكێ ره‌وتا حیكمه‌ كۆمبیت.

بابەتێ بودجە و مووچەیێ فەرمانبەران، هەلبژارتنێن پەڕلەمانێ کوردستانێ، هنارتنا پەترۆلا هەرێمێ، هێرشێن سەر پەترۆلگەها کۆرمۆر، ژ مژارێن سەرەکی یێن کۆمبوونێن سەرۆک نێچیرڤان بارزانی یە.

دوهى سه‌رۆكێ هه‌رێما كوردستانێ و سه‌رۆكوه‌زیرێ ئیراقێ ل به‌غدا كۆمبوون و دوپاتی ل سه‌ر پێشڤه‌برنا په‌یوه‌ندیێن دناڤبه‌را هه‌ولێر و به‌غدا دا كرن.

سه‌رۆكاتییا هه‌رێما كوردستانێ د به‌یانه‌كێ دا راگه‌هاند "سه‌رۆك نێچیرڤان بارزانى و سه‌رۆكوه‌زیرێ ئیراقێ دوپاتییێ ل سه‌ر پێشڤه‌برنا په‌یوه‌ندیێن دناڤبه‌را هه‌ولێر و به‌غدا دا هه‌روه‌سا به‌رده‌وامییا دانوستاندنان ل دۆر پرسێن هه‌ڤپشك دكه‌ن".

د به‌یانێ دا هاتیه‌ ژى "د كۆمبوونه‌كێ دا، ره‌وشا ئیراقێ ب گشتى و گاڤێن حكومه‌تا ئیراقێ د وارێن خزمه‌تكارى و گه‌شه‌پێدانێ دا ل گۆره‌ى كارنامه‌یا حكومه‌تێ بۆ باشتركرنا ره‌وشا خزمه‌تكارى و ژیارا وه‌لاتییان ل هه‌مى ئیراقێ هاتنه‌ به‌حسكرن".

دیار ژى كریه‌ "هه‌ردو ئالییان دوپاتى ل سه‌ر گرنگییا به‌رده‌وامییا دانوستاندنێن ئاڤاكه‌ر یێن تایبه‌ت ب پرسێن هه‌ڤپشك دناڤبه‌را حكومه‌تا ئیراقێ و هه‌رێما كوردستانێ دا كرن، هه‌روه‌سا به‌حس ل دویماهیك پێشهاتێن سیاسى یێن وه‌لاتى كرن و دوپاتى ل سه‌ر گرنگییا به‌رده‌وامییا پشته‌ڤانییێ ل بزاڤێن حكومه‌تێ ل سه‌ر ئاستێ ناڤخۆ و ده‌رڤه‌ هه‌روه‌سا بهێزكرنا په‌یوه‌ندیێن دناڤبه‌را هه‌ولێر و به‌غدا دا كرن و بۆ ڤێ چه‌ندێ پشته‌ڤانییا هه‌مى لایه‌نێن سیاسى یێن ئیراقێ ب گرنگ زانین".

به‌یانا سه‌رۆكاتییا هه‌رێمێ ئاماژه‌ ب وێ چه‌ندێ ژى كریه‌ "ژ لایێ خۆڤه‌، سه‌رۆكوه‌زیر سوودانى سه‌ره‌دانێن سه‌رۆك نێچیرڤان بارزانى بۆ به‌غدا بۆ چاره‌كرنا هه‌مى پرسێن هه‌ڤپشك ب گرنگ لقه‌له‌مدا و د به‌رانبه‌ر دا سه‌رۆكێ هه‌رێما كوردستانێ سوپاسییا گاڤێن سه‌رۆكوه‌زیر سوودانى و پێداگیرییا وى ل سه‌ر دانوستاندنان دناڤبه‌را هه‌مى لایه‌نان دا ب مه‌به‌ستا سه‌قامگیرییا وه‌لاتى كر".

ژ ئالیێ خۆ ڤه‌ ئۆفیسا راگه‌هاندنێ یا سه‌رۆكوه‌زیرێ ئیراقێ راگه‌هاند؛ سه‌ره‌دانێن سه‌رۆكێ هه‌رێما كوردستانێ بۆ به‌غدا گاڤه‌كا ئه‌رێنى یه‌ بۆ چاره‌كرنا هه‌مى كێشه‌یان.

ئۆفیسا راگه‌هاندنێ یا محه‌مه‌د شیاع سوودانى سه‌رۆكوه‌زیرێ ئیراقێ به‌یانه‌ك ل دۆر كۆمبوونا سوودانى ل گه‌ل سه‌رۆك نێچیرڤان بارزانى به‌لاڤكر و راگه‌هاند "سه‌رۆكوه‌زیرێ ئیراقێ سه‌ره‌دانێن سه‌رۆك نێچیرڤان بارزانى بۆ به‌غدا ب گاڤه‌كا ئه‌رێنى بۆ چاره‌كرنا هه‌مى كێشه‌یان لقه‌له‌مدا".

دیار ژى كریه‌ "د دیدارێ دا، گرنگترین بابه‌ت و كێشه‌ هاتنه‌ گه‌نگه‌شه‌كرن هه‌روه‌سا دوپاتى ل سه‌ر به‌رده‌وامییا دانوستاندنێن ئاڤاكه‌ر و بهێزكرنا په‌یوه‌ندیێن دناڤبه‌را به‌غدا و هه‌ولێرێ دا هاته‌ كرن".

 هه‌ر شڤێدى‌ سه‌رۆك نێچیرڤان بارزانى ل به‌غدا پشكدارى د كۆمبوونا هه‌ڤپه‌یمانییا برێڤه‌برنا ده‌وله‌تێ ژى دا كر.

سه‌رۆك نێچیرڤان بارزانى دوهى شه‌مبییێ ل به‌غدا ل گه‌ل محه‌مه‌د حه‌لبووسى سه‌رۆكێ به‌رێ یێ په‌رله‌مانێ ئیراقێ و سه‌رۆكێ پارتا ته‌قه‌دوم كۆمبوو.

ل گۆره‌ى به‌یانه‌كا سه‌رۆكاتییا هه‌رێما كوردستانێ "د كۆمبوونه‌كێ دا، دویماهیك پێشهاتێن ره‌وشا سیاسى ل ئیراقێ، بزاڤێن ده‌ستنیشانكرن و هه‌لبژارتنا سه‌رۆكێ جڤاتا نوینه‌رێن ئیراقێ، په‌یوه‌ندییێن هه‌ولێر و به‌غدا و دانوستاندنێن چاره‌كرنا كێشه‌یێن وان هاتنه‌ به‌حسكرن".

دیار ژى كریه‌ "دویماهیك پێشهاتێن ره‌وشا ده‌ڤه‌رێ ب گشتى و كارتێكرنێن وان ل سه‌ر ئیراقێ ل گه‌ل چه‌ند پرسێن جهێ گرنگیپێدانا هه‌ڤپشك ژ ته‌وه‌رێن دى یێن كۆمبوونێ بوون".