"نێچیرڤان بارزانى گۆتیه سه‌رۆككۆمارى حكومه‌تا هه‌رێمێ دڤێت هه‌مى كێشه ل گه‌ل به‌غدایێ بهێنه چاره‌كرن"
بەلاڤ بکە
گاڤ
سه‌رۆكایه‌تییا كۆمارا ئیراقێ ناڤه‌ڕۆكا كۆمبوونا سه‌رۆك نێچیرڤان بارزانى و سه‌رۆككۆمارێ ئیراقێ به‌لاڤكر و راگه‌هاند، نیچیرڤان برزانى گۆتیه سه‌رۆككۆمارى حكومه‌تا هه‌رێمێ دڤێت هه‌مى كێشه ل گه‌ل به‌غدایێ بهێنه چاره‌كرن.
سه‌رۆكایه‌تییا كۆمارا ئیراقێ به‌یانه‌ك ل دۆر كۆمبوونا ئه‌ڤرۆ سپێدێ یا نێچیرڤان بارزانى، سه‌رۆكێ هه‌رێما كوردستانێ و د. له‌تیف ره‌شید، سه‌رۆككۆمارێ ئیراقێ به‌لاڤكر و راگه‌هاند، د كۆمبوونێ دا ره‌وشا وه‌لاتى و پێشڤه‌چوون و دوماهى گوهۆڕینێن ده‌ڤه‌رێ به‌حسكرن و دیاركر، سه‌رۆككۆمارى دوپاتى ل ئێمناهى و ئارامیێ كریه و ب بنه‌مایێ سه‌ره‌كى یێ ئاڤاكرنا وه‌لاتى ل قه‌له‌م دایه و ب تایبه‌ت ژى د وارێ پێشكه‌فتنا ئابۆرى، خزمه‌تكارى و ره‌وشا ژیارا وه‌لاتییان و دوپاتى ل بجهئینانا به‌رنامه‌یێ وه‌زاره‌تان و داخوازیێن وه‌لاتییان كریه.
هه‌ر د كۆمبوونا ل كۆچكا سه‌لام دا سه‌رۆككۆمارێ ئیراقێ ب گرنگ ته‌ماشه‌یى سه‌ره‌دانێن هه‌ر دو حكومه‌تێن ئیراق و هه‌رێما كوردستانێ كریه بۆ گه‌هشتن ب لێكتێگه‌هشتنێن هه‌ڤپشك و باشتكرنا دانوستاندنێن ئاڤاكه‌ر د ناڤبه‌را هه‌ر دو ئالییان دا ل سه‌ر بنه‌مایی ده‌ستوورى و قانوونێ و گه‌ره‌نتیكرنا به‌رژه‌وه‌ندیێن هه‌مى وه‌لاتیێن ئیراقى.
د. له‌تیف دایه زانین په‌یوه‌ندیێن ناڤبه‌را هه‌ر دو ئالییان كارتێكرنه‌كا ئێكسه‌ر ل سه‌ر چاره‌كرنا كێشه‌یێن هه‌لاویستى دكه‌ن و رێكێ ل هه‌مبه‌رى بجهئینانا پڕۆژیان و ئاڤه‌دانكرنێ ڤه‌دكه‌ن.
سه‌رۆككۆمارى پشته‌ڤانییا خۆ بۆ په‌یوه‌ندیێن باش یێن ناڤبه‌را هه‌ر دو حكومه‌تان دوپاتكرن و دیاركر، ب هه‌ڤكارى و هه‌ماهه‌نگى دێ هه‌مى ئالۆزى و ئاسته‌نگان ده‌رباز كه‌ن.
سه‌رۆككۆمار و سه‌رۆكێ هه‌رێما كوردستانێ هێرشا ل سه‌ر كۆرمۆر شه‌رمزار كر و دوپاتكر، كارێن ب وى ئاوایى سه‌روه‌ریا نشتیمانى بنپێدكه‌ن و ل سه‌ر ئاساییش و ئارامییا وه‌لاتى گه‌فن.
د كۆمبوونێ دا سه‌رۆكێ هه‌رێما كوردستانێ ب گرنگ به‌حس ل چاره‌كرنا كێشه‌یێن هه‌لاویستى كریه و هه‌ڤكارییا هه‌ڤپشك بۆ چاره‌كرنا هه‌مى كێشه‌یان كریه و ب تایبه‌ت ژى ئه‌وێن گرێدایى ره‌وشا ژیارا وه‌لاتییان و خزمه‌تكارییان.
سه‌رۆكایه‌تیا كۆمارى دایه‌زانین سه‌رۆك نێچیرڤان بارزانى دیاركریه، حكومه‌تا هه‌رێمێ دڤێت چاره‌یێن دروست بۆ هه‌مى كێشه‌یێن هه‌لاویستى د ناڤبه‌را حكومه‌تێن ئیراق و به‌غدایێ دا هه‌بن و ل گه‌ل وان ژى یێن گرێدایى دادوه‌ریێ، شه‌فافیه‌تێ و ئارامى و ئێمناهییا وه‌لاتى.
