مالکی سەرەدانا سەرۆک نێچیرڤان بارزانی بۆ بەغدا چاوا دهەلسەنگینیت؟
گاڤ
سەرۆکێ هەڤپەیمانییا دەولەتا یاسایێ خۆشحالییا خۆ ب سەرەدانا سەرۆک نێچیرڤان بارزانی بۆ بەغدا دیارکر و راگەهاند: سەرۆکێ هەرێما کوردستانێ ب کۆمەکا چارەیان ڤە چوویە بەغدا.
نووری مالکی، سەرۆکێ هەڤپەیمانییا دەولەتا یاسایێ ئەڤرۆ د کۆنگرەیەکێ رۆژنامەڤانی دا راگەهاند: ئەو خۆشحالبوو کو ئەڤرۆ نێچیرڤان بارزانی، سەرۆکێ هەرێما کوردستانێ ل گەل وان کۆم بوو، ژبەر کو سەرۆکێ هەرێما کوردستانێ ل گەل خۆ کۆمەکا پرسان و ژمارەکا چارەیان و ئیرادەیەکا بهێز بۆ چارەکرنا کێشەیێن د ناڤبەرا هەولێرێ و بەغدا ل گەل خۆ برینە بەغدا.
مالکی هەروەسا گۆت: وان باوەری هەیە ب ئانەهییا خودای دێ شێین ئەو کێشەیێن تا نوکە چارە نەبووین، چارەیان بۆ ببینین و ئەو هیڤیدارن کۆمبوونێن بەرفرەهتر ژی بهێنە کرن.
دەربارەی هەلبژارتنێن پەرلەمانێ کوردستانێ، مالکی گۆت: دوهی وان د کۆمبوونا هەڤپەیمانییا برێڤەبرنا دەولەتێ دا ب ئامادەبوونا بەرێز نێچیرڤان بارزانی بەحسێ هەلبژارتنان ژی کر، ئەو باوەر دکەن هەلبژارتن دێ د دەمێ خۆ دا هێنە کرن و هەماهەنگییەک بۆ وێ یەکێ د ناڤبەرا هەردو ئالییان دا هەیە.
هەر ل سەر پرسا هەلبژارتنێن هەرێما کوردستانێ، مالکی راگەهاند: ل سەرۆکاتییا هەرێما کوردستانێ پێشنیازەک هەیە هەلبژارتن بۆ مەها دەهـ بهێنە پاشخستن، هەڤپەیمانییا برێڤەبرنا دەولەتێ دەستهەلاتا نینە مایێ خۆ تێ بکەت. ئەو بابەت دەستهەلاتا سەرۆکاتییا هەرێما کوردستانێ و کۆمسیۆنا هەلبژارتنانە، ئەو دشێن ل سەر رێکبکەڤن.
دەربارەی مووچەی مالکی دوپاتی ل بەردەوامییا هنارتنا مووچەیێن هەرێما کوردستانێ ژ ئالییێ بەغدا ڤە دا و گۆت: مووچە دهێتە هنارتن و هنارتنا مووچەی دێ بەردەوام بیت.