راگههاندنهك ژ سهرۆكایهتییا ههرێما كوردستانێ ل دۆر كۆمبوونێن سهرۆك نێچیرڤان بارزانى ل بهغدا
گاڤ
سهرۆكێ ههرێما كوردستانێ و ژمارهیهكا سهركردهیێن ئیراقى ل بهغدا رهوشا ئیراقێ و كێشهیێن دناڤبهرا ههولێر و بهغدا دا بهحسكرن.
سهرۆكاتییا ههرێما كوردستانێ راگههاند؛ سهرۆك نێچیرڤان بارزانى د رۆژا دوێ یا سهرهدانا خۆ دا بۆ بهغدا ئهڤرۆ ئێكشهمبییێ ل گهل سهرۆككۆمار، سهرۆكێ جڤاتا بلند یا دادوهرى، سهرۆكێ جڤاتا نوینهران ب وهكالهت و شیرهتكارێ ئاساییشا نیشتیمانى و ژمارهیهكا سهركردهیێن ئیراقێ دیدار و كۆمبوون ئهنجامدان.
سهرۆكاتییێ دیار ژى كریه "سهرۆك نێچیرڤان بارزانى د دیدار و كۆمبوونێن خۆ دا ل گهل عهمار حهكیم سهرۆكێ رهوتێ نیشتیمانى یێ حیكمه، عادل عهبدولمههدى سهرۆكوهزیرێ بهرێ یێ ئیراقێ، سابت عهباسى سهرۆكێ ههڤپهیمانییا حهسم یا نیشتیمانى، نورى مالكى سهرۆكێ ههڤپهیمانییا دهولهتا یاسایێ، هادى عامرى سهرۆكێ رێكخراوا بهدر، موسهننا سامهرائى سهرۆكێ ههڤپهیمانییا عهزم، حهیدهر عهبادى سهرۆكوهزیرێ بهرێ یێ ئیراقێ، عهبدولساده ئهلفرێجى ئهمیندارێ گشتى یێ ههڤپهیمانییا نههج یا نیشتیمانى و شێخ خهمیس خهنجهر سهرۆكێ ههڤپهیمانییا سهروهرى، رهوشا ئیراقێ و كێشهیێن ههولێر و بهغدا بهحسكرن".
سهرۆك نێچیرڤان بارزانى دوپاتكر "ههرێما كوردستانێ وهك ههردهم یا بهرههڤه بۆ چارهكرنا كێشهیان ل گهل حكومهت و سازیێن فیدرالى یێن ئیراقێ ب رێكا دانوستاندنێ و لێكتێگههشتنێ ل سهر بنیاتێ دهستوورى".
سهركردهیێن لایهنێن ئیراقى سوپاسییا بزاڤ و رۆلێ سهرۆك نێچیرڤان بارزانى بۆ چارهكرنا كێشهیان و بهردهوامییا سهرهدان و پهیوهندیێن وى ل گهل هێز و لایهنێن ئیراقى كرن.
دابینكرنا بودجه و شایستهیێن دارایى یێن ههرێما كوردستانێ، رهوشا ههرێما كوردستانێ، پێشهاتێن دهڤهرێ ب گشتى و مهترسییێن تیرۆرێ ژ تهوهرێن دى یێن كۆمبوونان بوون.