ئهڤرۆ پهڕلهمانێ ئیراقێ دێ ل دۆر چ كۆمبیت؟
گاڤ
فهرمانگهها میدیا و زانیارى یا پهڕلهمانێ ئیراقێ راگههاند، ئهڤرۆ پهڕلهمان دێ كۆمبیت و دێ خواندنا ئێكێ بۆ قانوونا چاندنا ئهندامێن لهشێ مرۆڤى و راستڤهكرنا قانوونا قهرهبووكرنا وان كهسێن ژ دهستێ رژێما بهعس ئهندامهكێ لهشێ خۆ ژ دهست داین كهت.
ل گۆڕهیى كارنامهیا فهرمانگهها میدیا و زانیارى یا پهڕلهمانێ ئیراقێ ئهڤرۆ پشتى نیڤرۆ پهڕلهمانێ ئیراقێ دێ كۆمبیت و راستڤهكرنا ئێكێ بۆ ماددهیێ چار ژ قانوونا ژماره یا 11 یا ل سالا 2014ێ دهرچوویى كو تایبهته ب چاندنا ئهندامێن لهشێ مرۆڤى.
ههر د كۆمبوونا ئهڤرۆ دا خواندنا ئێكی بۆ پێشنیازا قانوون و راستڤهكرنا قانوونێن دى ژى دێ هێته كرن كو د ناڤا وان دا خواندنا ئێكێ بۆ ماددهیێ 48 پێشنیازا قانوونا رێكخستنا كارێ سهندیكا كرێكاران و فهرمانبهرێن پیشهیى ل ئیراقێ دێ هێتهكرن.
ههروهسا خواندنا ئێكێ بۆ پڕۆژهقانوونهكێ دێ هێته كرن كو كۆمارا ئیراقێ بچیته د ناڤا پرۆتۆكۆلا كیگالى یا سالا 2016ێ دا، ههڤدهم پێنجهمین راستڤهكرنا پرۆتۆكۆلا مۆنتریال دهربارهیى ماددهیێن زیان بهخش ژى دێ هێته كرن.
ههر د تهوهرهكێ دى یێ كۆمبوونێ دا خواندنا ئێكێ بۆ پێشنیازا سێیهمین راستڤهكرنا قانوونا زیانڤێكهفتیێن دهستێ رژێما بهعس دێ هێتهكرن كو بۆ وان كهسانه یێن ئهندامهكێ لهشێ خۆ ژ دهستداین.
ل گۆڕهیى كارنامێ خواندنا ئێكێ بۆ دووهمین راستڤهكرنا ماددهیێ دووێ ژ قانوونا ژماره چار یا زیندانیێن سیاسى یا سالا 2006ێ دێ هێتهكرن.
برگا دوماهیێ ژى د كۆمبوونا ئهڤرۆ یا پهڕلهمانى دا دانوستاندن دێ ل سهر خواندنا دووهم پێشنیازا قانوونا راستڤهكرى یا ئێكێ یا رێكخستنا باوهرنامه و پلهیێن زانستى یێن ل وهلاتێن ئهرهبى و بیانى هاتینه ب دهستخستن دێ هێتهكرن.