بزاڤ دهێنه كرن به‌رهه‌مێ گه‌نمى یێ جۆتیارێن هه‌رێما كوردستانێ ب ته‌مامى بهێته وه‌رگرتن
بەلاڤ بکە
گاڤ
بزاڤ دهێنه كرن رێگرییێن ل هه‌مبه‌ر جۆتیارێن هه‌رێما كوردستانێ و وه‌رگرتنا گه‌نمێ وان نه‌مینن و وه‌كى جۆتیارێن ده‌ڤه‌رێن دى یێن ئیراقێ، به‌رهه‌مێ جۆتیارێن كورد ژى ب ته‌مامى بهێته وه‌رگرتن.
شاخه‌وان عه‌بدوللا جێگرێ سه‌رۆكێ په‌رله‌مانێ ئیراقێ گۆت "سالانه ئه‌و كێشه‌یه دروست دبیت كو بڕه‌كا كێم یا گه‌نمێ هه‌رێما كوردستانێ دهێته وه‌رگرتن، له‌وا مه دڤێت ئه‌ڤ ساله ئه‌و رێگرى نه‌مینن".
دیار ژى كر "هه‌مى هاریكارییان دێ بۆ وه‌زاره‌تا چاندنێ و حكومه‌تا هه‌رێما كوردستانێ كه‌ین دا كو كێشه‌یا وه‌رگرتنا به‌رهه‌مێن جۆتیاران ب رێژه نه‌مینیت، به‌لكو پێدڤییه وه‌كى باژێڕێن دى یێن ئیراقێ ئه‌و گه‌نمێ جۆتیاران چاندى هه‌مى بهێته وه‌رگرتن".
خۆیا ژى كر "ئه‌م بۆ ڤى بابه‌تى ل گه‌ل سه‌رۆكوه‌زیرێ ئیراقێ و وه‌زاره‌تا چاندنێ ل سه‌ر خه‌تین".
سه‌باره‌ت رێگرییێن ل جۆتیارێن كورد ل هنده‌ك ده‌ڤه‌رێن ده‌رڤه‌ى ئیداره‌یا هه‌رێمێ دهێنه كرن، جێگرێ سه‌رۆكێ په‌رله‌مانێ ئیراقێ ئاماژه ب وێ چه‌ندێ كر كو بۆ چاره‌كرنا ڤى بابه‌تى وان ل گه‌ل فه‌رمانده‌یا ئۆپه‌راسیۆنێن هه‌ڤپشك هه‌روه‌سا ل گه‌ل وه‌زیرێ به‌رگرییێ یێ ئیراقێ ژى ئاخفتییه.
