گاڤ

جێگرێ په‌یڤدارێ وه‌زاره‌تا ده‌رڤه‌ یا ئه‌مریكا ئه‌ڤرۆ دوشه‌مبییێ راگه‌هاند؛ هێرشا ل سه‌ر كێلگه‌ها كۆرمۆر هێرشه‌ ل سه‌ر سه‌روه‌رییا ئیراقێ.

ڤێدانت پاتێل جێگرێ په‌یڤدارێ وه‌زاره‌تا ده‌رڤه‌ یا ئه‌مریكا ل دۆر هێرشا ئه‌ینییا بۆرى ل سه‌ر كێلگه‌ها كۆرمۆر دیاركر "ئه‌و جۆره‌ هێرشه‌ ل سه‌ر ژێرخانه‌یا مه‌ده‌نى، هێرشه‌كا ئێكسه‌رن بۆ سه‌ر سه‌روه‌رییا ئاخا ئیراقێ".

زێده‌تر ژى گۆت "ئێكسه‌ر پشتى هێرشێ، ئه‌مریكا ئه‌و هێرشه‌ شه‌رمزار كربوو".

وه‌زاره‌تا ده‌رڤه‌ یا ئه‌مریكا ل رۆژا شه‌مبییا بۆرى ژى هێرشا ل سه‌ر كێلگه‌ها كۆرمۆر شه‌رمزاركربوو، ماتیۆ میله‌ر په‌یڤدارێ وه‌زاره‌تێ د به‌یانه‌كێ دا پشته‌ڤانییا وه‌لاتێ خۆ بۆ ئیراقێ و هه‌رێما كوردستانێ و پاراستنا سه‌قامگیرى و سه‌روه‌ریێ دیاركربوو.

میله‌ر راگه‌هاند بوو كو ئه‌و هێرشه‌ بنپێكرنا سه‌روه‌رییا ئیراقێ یه‌ و داخوازا ئه‌نجامدانا لێكۆلینێ ل دۆر هێرشێ و راده‌ستكرنا بكه‌رێن وێ بۆ سازیێن دادوه‌رى كربوو.

ل رۆژا ئه‌ینییا بۆرى، هێرشه‌ك ل سه‌ر كێلگه‌ها كۆرمۆر ل قه‌زایا چه‌مچه‌مال هاتبوو كرن و تێدا چار كارمه‌ند شه‌هید ببوون و ژماره‌یه‌كا دى بریندار ببوون.