گاڤ

هەر ژ هاتنا پێلا بارینا تۆزێ ژ شڤێدی و تا نها پتری 100 کەسان ژ بەر بهێنتەنگیێ سەرەدانا نەخۆشخانەیان کرینە.

ژ شڤێدی وەرە پێلەکا تۆزێ سنۆرێ پاریزگەها دهۆکێ ڤەگرتییە و ل گۆرەیی سەقاناسییا هەرێما کوردستانێ تا ئەڤشەڤە پێلا بارینا تۆزێ دێ بەردەوام بیت.

د. سەگڤان دۆسکی، رێڤەبەرێ نەخۆشخانەیا ئازادی ل دهۆکێ بۆ گاڤ گۆت: ژ بەر بارینا تۆزێ بێهنته‌نگى بۆ زێده‌تر ژ 100 كه‌سان دروستبوویه‌ و سه‌ره‌دانا نه‌خۆشخانه‌یا ئازادى كرینه‌ و چاره‌سه‌رى وه‌رگرتینه‌، 5 ژ وان ل نەخۆشخانەیێ هاتینە نڤاندن لێ رەوشا وان جێگیرە.

ژ ئالیێ خۆ ڤه‌ ئەمیر عەلی، بەرپرسێ راگەهاندنا رێڤەبەرییا گشتی یا ساخلەمییا زاخۆ ژی بۆ گاڤ دیارکر، ژ شەڤا دەربازبووی و تا نها 6 کەسان ژ بەر بێهنتەنگیێ سەرەدانا نەخۆشخانەیێ کریە نوكه‌ چارەسەریێن پێدڤی بۆ هاتینە کرن و بۆ مالێن خۆ ڤەگەریایینە.

سه‌قاناسییا ئیراقێ دبێژیت: پێلا بارنێ ئه‌ڤ شه‌ڤه‌ ده‌ستپێدكه‌ت و تا شه‌مبیێ دێ كارتێكرنا وێ پێلێ ل سه‌ر ئیراقێ هه‌میێ به‌رده‌وام بیت.