گاڤ

وەزیرێن کارەبێ یێن حکومەتا هەرێما کوردستانێ و حکومەتا فیدرال کۆمبوون و پشتی کۆمبوونێ د کۆنگرەیەکێ رۆژنامەڤانی دا راگەهاند: هێرشا ل سەر کۆرمۆر هاتییە کرن، کارتێکرن ل دەمژمێرێن کارەبا نشتیمانی ل هەرێما کوردستانێ و ئیراقێ کربوو، لەورا دێ هەماهەنگییا وان بەردەوام بیت.

کەمال محەمەد، وەزیرێ کارەبێ یێ هەرێما کوردستانێ راگەهاند: بەرهەمئینانا غازێ ل کێلگەها کۆرمۆر ئاسایی بوویە، لەورا دەمژمێرێن کارەبا نشتیمانی ژی ئاسایی بووینە و وان داخواز ژ حکومەتا فیدرال کرییە رازیبوونێ بدەت کو کێلگەها کۆرمۆر ب سیستەمێ دژی درۆنان بهێتە پاراستن، ژبەر کو هەر دەما کارتێکرن ل کۆرمۆر دبیت، کارتێکرن ل کارەبا نشتیمانی ل ئیراقێ ژی دبیت.

د هەمان کۆنگرەیێ رۆژنامەڤانی دا، زیاد عەلی فازل، وەزیرێ کارەبێ یێ حکومەتا ئیراقێ راگەهاند: هێرشا ل سەر کۆرمۆر هاتییە کرن، کارتێکرن ل کارەبا نشتیمانی ل ئیراقێ ژی کر و کورتهێنان د دەمژمێرێن دانا کارەبا نشتیمانی دا چێبوو، ب تایبەت ل پارێزگەها نەینەوا، لەورا هەماهەنگی د ناڤبەرا وان و هەرێما کوردستانێ دا دێ بەردەوام بیت.